Pasditen e djeshme, në Turqi ka ndodhur një sulm terrorist, ku si pasojë mbetën 6 viktima dhe 88 të plagosur.
Ndërkohë që ministri i Brendshëm i Turqisë ka akuzuar në mënyrë indirekte SHBA-të për sulmin tragjik që ndodhi në mes të Stambollit.
“Ngushëllimet e SHBA-ve janë një situatë e ngjashme me atë kur vrasësi është i pari që gjendet në vendin e krimit. Ne e morëm mesazhi, tani do të shihet edhe përgjigjja jonë”, deklaroi Soylu mbërëmë para mediave teksa tha se nuk i pranonin ngushëllimet e SHBA-ve.
Gjithashtu sipas tij, gruaja që vendosi bombën erdhi nga Siria në Stamboll dhe ka dyshime të forta se i përket grupeve terroriste atje, ndërsa nuk ka dhënë ende asnjë detaj mbi emrin e grupit.
Kjo është një akuzë e fortë ndaj SHBA-ve në një kohë kur raportet mes Ankarasë dhe Uashingtonit janë të ndera. Turqia është në prag të fushatës për zgjedhjet Presidenciale në pranverën e vitit të ardhshëm dhe sulmet terroriste janë duke u konsideruar si një fenomen i përhershëm në muajt para zgjedhjeve turke, gjë për të cilën ekspertët e sigurisë hedhin dyshime të forta se gjithçka ndodh për të rritur tensionin dhe polarizimin në shoqëri duke ndikuar drejtpërdrejt më pas në rezultat.
