Kryetari i Partisë Demokratike, Sali Berisha, zhvilloi sot një konferencë për shtyp në selinë blu, ku dënoi ashpër sulmin e ndodhur mbrëmjen e djeshme në kanalin e ujit në veri të Kosovës.
Berisha e cilësoi këtë ngjarje si një akt terrorist, duke akuzuar Beogradin si përgjegjës për shpërthimet e ditëve të fundit në Kosovë.
Kryedemokrati theksoi se kjo situatë i shërben interesave të Kremlinit, i cili, sipas tij, synon krijimin e një konflikti të ri në Ballkan për të ndihmuar strategjinë e tij në luftën në Ukrainë.
Së pari dua të dënoj me forcën më të madhe, aktet terroriste në Zubin-Potok, Zveçan të furnizimit me ujë të qytetarëve të Kosovës, por edhe institucionet e Kosovës në ato territore. Këto akte terroriste të cilat zhvillohen pas shpalljes nga presidentja e Kosovës të datës së zgjedhjeve dhe shprehjes së vullnetit të Listës Serbe për marrjen pjesë në këto zgjedhje, kanë synim madhor destabilizimin e atij rajoni dhe dekurajimin e serbëve, për të marrë pjesë në proceset demokratike, në Kosovë në vendin e tyre.
Këto akte janë një aktakuzë e rëndë e Beogradit, i cili kërkon me çdo kusht një zonë konfliktuale të re, kërkon me çdo kusht, destabilizimin e Kosovës. Natyrisht një skenar i tillë, është skenar tipik i Rusisë së vogël, që i shkon në interesin më të madh edhe të Kremlinit. Situata në Kosovë, kriza e konservuar në Kosovë, është rrjedhojë e qëndrimeve fund e krye konfliktuale të Beogradit, synimit të tij për të mbajtur shtetin serb në Kosovë dhe për të zmadhuar siç shprehej vetë Vuçiçi Serbinë, duke nënkuptuar këtë zmadhim me territoret e Kosovës. Kjo situatë është në interesin më të mirë të Kremlinit, i cili kërkon që krahas fronit të luftës në agresionin që bëri ndaj Ukrainës, të ketë edhe një konflikt tjetër në Ballkan, po në interesa të tij.”, tha Berisha.
