Ambasadorja amerikane në Mal të Zi, Judy Rising Reinke, ka dënuar sulmin ndaj ambasadës malazeze në Beograd.
Në një postim në Twitter, ajo shprehet e tronditur për përdhosjen e flamurit, ndërsa e ka konsideruar sulmin totalisht të papranueshëm.
Ajo u ka bërë palëve thirrje për dialog.
“Jam e tronditur nga pamjet e përdhosjes së flamurit. Sulmi ndaj ambasadës malazeze është absolutisht i papranueshëm. Dallimet e mendimeve duhet të adresohen përmes dialogut, jo dhunës dhe vandalizmit”, shkruan Rising Reinke.
Aktualisht dhjetëra zyrtarë dhe ish-zyrtarë të mirënjohur, akademikë dhe figura të kulturës në Ballkan, kanë nënshkruar peticionin online, kundër kërcënimit të paqes në rajon nga Serbia.
Kryeministri malazez, Dushko Markoviç shfaqi habinë për qëndrimin e autoriteteve serbe, pas djegies së flamurit të Malit të Zi.
Presidenti serb, Aleksandër Vuçiç, tha se ambasada nuk u kërcënua dhe askush nuk u përpoq të hynte brenda saj.
Më 28 dhjetor qindra mbështetës të kishës ortodokse serbe mësynë në ambasadën malazeze në Beograd, duke hedhur flakadanë dhe vezë.
Ata kërkuan që ambasadori malazez të shpallej non grata.
Gjatë marshimit pati edhe thirrje si “Kosova është zemra e Serbisë”.
Situata mes dy vendeve të rajonit, u tensionua, pasi parlamenti i Malit të Zi, kaloi ligjin për komunitetet fetare.
Sipas komunitetit serb në Mal të Zi, parlamenti kërkon që të përvetësojë pronat e kishës ortodokse.
Gjatë votimit në parlament, sigurimi i Kuvendit nxorri me forcë nga salla deputetët e opozitës serbe.
Këta të fundit bllokuan foltoren, bënë thirrje për lufte dhe filluan të ofendonin deputetët.
