Të dielën në mëngjes, një sulm me thikë tronditi qytetin Bielefeld në Gjermani, ku disa persona po festonin pranë një bari në ambient të hapur.
Një burrë i dyshuar i armatosur sulmoi papritur grupin, duke plagosur të paktën pesë persona, katër prej të cilëve ndodhen në gjendje të rëndë shëndetësore.
Sipas informacioneve nga policia dhe prokuroria lokale, ngjarja ndodhi rreth orës 04:20 në qendër të Bielefeld-it. Viktimat, të moshave nga 22 deri në 27 vjeç, vijnë nga Bielefeld dhe qytete përreth, dhe kanë lidhje me futbollin lokal.
Gjatë sulmit, disa nga të plagosurit tentuan të mbrohen duke sulmuar agresorin, i cili dyshohet se ka pësuar plagë në fytyrë dhe më pas është larguar nga vendi i ngjarjes.
Policia konfirmoi se i dyshuari është një 35-vjeçar sirian që jeton në Gjermani dhe është ende në arrati. Në vendin e ngjarjes janë gjetur disa thika dhe një çantë me dokumente personale të sulmuesit, si dhe një shishe me një lëng që mbante erë benzine, gjë që ngre dyshime për motive të tjera.
Autoritetet kanë nisur një operacion të gjerë për kapjen e të dyshuarit dhe kanë publikuar foton e tij, duke i kërkuar qytetarëve të japin çdo informacion që mund të ndihmojë në lokalizimin e tij.
Policia paralajmëron se sulmuesi mund të jetë i rrezikshëm dhe i armatosur, ndaj kushdo që e sheh duhet të ruajë distancën dhe të njoftojë menjëherë autoritetet.
