Kryebashkiaku i Lushnjes, Fatos Tushe, mbeti i plagosur si pasojë e një sulmi me granatë në zyrën e tij.
“Newsbomb” shkruan, se Tushe është nisur drejt Tiranës për mjekim të specializuar.
Ai ka marrë dëmtime në këmbë dhe në shpatullën e djathtë.
Si pasojë e shpërthimit ka mbetur e plagosur edhe sekretarja e tij, Erisa Qalliu.
Dyshohet se autor i sulmit është ish-shoferi Gëzim Saraçi, të cilin Tushe e kishte pushuar nga puna.
Policia ka ngritur postblloqe në të gjithë Lushnjes dhe po punohet për kapjen e Saraçit.
Në Lushnje është nisur edhe drejtori i përgjithshëm i policisë Ardi Veliu.
Njoftimi i policisë
Sot, rreth orës 09:00, në zyrën e Kryetarit të Bashkisë Lushnjë, dyshohet se është hedhur një granatë dore dhe për pasojë është dëmtuar Kryetari i Bashkisë shtetasi F. T. dhe sekretarja e Bashkisë, shtetasja E. Q., të cilët ndodhen në spitalin e Lushnjës, nën kujdesin e mjekëve
Nga veprimet e para hetimore dyshohet se autor i kësaj ngjarjeje është ish-shoferi i Kryetarit të Bashkisë, shtetasi G. S., i cili pasi ka hedhur granatën është larguar menjëherë nga ambientet e Bashkisë Lushnjë.
Forca të shumta policie të Komisariatit të Policisë Lushnjë, të DVP Fier, Renea e FNSH e Fierit po krehin zonën, me qëllim kapjen dhe arrestimin e autorit.
Grupi i posaçëm hetimor, me Specialistë nga Departamenti i Policise Kriminale ne Policine e Shtetit dhe DVP Fier, nën drejtimin e Prokurorisë po punon për zbardhjen e plotë të ngjarjes.
