Mëngjesin e ditës së djeshme një sulm i rëndë me kallashnikov ndodhi ndaj godinës së televizionit të “Top Channel”, ku mbeti viktimë roja 60-vjeçare Pal Kola. Ndërkohë që u ndaluan në Vlorë, 2 shkodranë që dyshoheshin se kishin lidhje me ngjarjen, ku një ndër to ishte ish-dhëndri i viktimës,Roberto Papçi.
Bëhet e ditur se Papçi së bashku me të ndaluarin tjetër Agustin Tonaj janë marrë në pyetje me orë të tëra dhe kanë mohuar të kenë lidhje me ngjarjen.
Theksojmë se 2 shkodranët ishin pikasur nga kamerat e sigurisë teksa hidhnin diçka në hyrje të Vlorës dhe policia, me dyshimet se bëhej fjalë për armë zjarri, i ka shoqëruar në komisariat për t’i marrë në pyetje. Pikërisht gjatë procesit, blutë e Vlorës kanë kuptuar se njëri prej të ndaluarve ishte ish-dhëndri i Kolës.
Madje dyshimet u shtuan kur Policia është vënë në dijeni të problemeve mes dy familjeve. Roberto Papçi, dy vite më parë është divorcuar nga vajza e Kolës dhe çifti kanë pasur konflikte për ndarjen dhe kujdestarinë e fëmijëve.
Papçit dhe Tonajt u është bërë testi i faktorëve plotësues, me qëllim gjetjen e grimcave të barutit të djegur në duar dhe rrobat e tyre. Po ashtu u janë marrë edhe shenjat e gishtave, ndaj priten përgjigje më konkrete lidhur me rolin e tyre në këtë ngjarje, pas përfundimit të analizave. Vlen të theksojmë se implikimi i 2 personave të ndaluar në sulmin me kallashnikov ndaj Top Channel, do të shënonte një pikë të fortë në hetimin e ngjarjes. Pasi nga hetimi si sulm ndaj televizionit dhe fjaëls së lirë në këtë rast do hetohej si sulm direkt ndaj rojës Pal Kola.
