Pasditen e sotme në Vlorë janë ndaluar 2 persona nga Shkodra, pasi dyshohet se mund të kenë lidhje me atentatin që u bë ndaj televizionit kombëtar “Top Channel” ku mbeti i vrarë roja Pal Kola. Bëhet e ditur se dy shkodranët kanë qenë duke lëvizur me makinë pas ngjarjes dhe ndalimi është kryer pas një pike kontrolli. Për të shuar këtë dyshim një grup hetimor është nisur në Vlorë për t’i shoqëruar drejt Tiranës këto dy persona me qëllim marrjen në pyetje.Dy shkodranët janë ndaluar edhe për shkakun se mjeti me të cilin kanë udhëtuar autorët e sulmit ka lidhje me qytetin Vlorës dhe se ishte grabitur në Shkodër.
Shqipëria u trondit mëngjesin e së hënës nga ngjarja më e rëndë kundër medias e regjistruar në vend në shumë dhe shumë vite, me pasojë një humbje jete. Një automjet u gjet më vonë i djegur rreth 30 kilometra më tutje me dy kallashnikovë që dyshohet se u përdorën në atentat. Krerët e vendit, gazetarët dhe organizatat e lirisë së shprehjes dënuan sulmin dhe kërkuan gjetjen e shpejtë të autorëve.
Vlen të theksojmë se pas ngjarjes së rëndë ndodhur mesnatën e së dielës pranë ambienteve të tij reagon vetë Top Channel. Top Channel, televizioni që u sulmua me breshëri kallashnikovi e ka konsideruar ngjarjen një akt terrorist.
Top Channel shkruan se kërkon dhe pret zbardhjen e plotë të ngjarjes nga organet ligjzbatuese. Zbardhja e këtij akti, sipas televizionit në fjalë, duhet të jetë prioritet për organet ligjzbatuese, sepse është vrarë një punonjës, por konsiderohet gjithashtu një atentat ndaj televizionit e fjalës së lirë.
