Pa kaluar as 24 orë nga shpallja e një armëpushimi historik të ndërmjetësuar nga Shtetet e Bashkuara, tensionet mes Izraelit dhe Iranit janë rikthyer me shpejtësi.
Tel Avivi akuzon Teheranin për shkelje të marrëveshjes, duke pretenduar se ky i fundit ka lëshuar raketa balistike drejt territorit izraelit.
Irani, nga ana e tij, i ka mohuar kategorikisht këto akuza. Sipas transmetuesit shtetëror IRIB dhe agjencisë së lajmeve ISNA, autoritetet iraniane deklarojnë se nuk kanë ndërmarrë asnjë veprim ushtarak kundër Izraelit që nga hyrja në fuqi e armëpushimit, duke i quajtur pretendimet e Izraelit “të pavërteta” dhe një “provokim të qëllimshëm”.
Ndërkohë, Ministri i Mbrojtjes i Izraelit, Israel Katz, ka reaguar duke e cilësuar këtë si një shkelje të drejtpërdrejtë të marrëveshjes dhe ka urdhëruar sulme të ashpra ndaj objektivave iraniane në zemër të Teheranit.
Media izraelite raportoi se forcat izraelite kishin interceptuar dy raketa balistike që dyshohet se ishin lëshuar nga Irani.
Por Teherani i ka hedhur poshtë këto raportime, duke i cilësuar si pjesë e një fushate dezinformimi për të justifikuar veprimet ushtarake të Izraelit.
