Aleanca e Traktatit të Atlantikut të Veriut (NATO) ka dënuar sulmin e mbrëmshëm të Iranit kundër Izraelit, ndërsa ka bërë thirrje për përmbajtje në mënyrë që situata të mos përshkallëzohet më tej. Zëdhënësja e NATO-s, Farah Dakhlallah në një postim në rrjetin social “X”, ka deklaruar se Aleanca e deklaron jetike që konflikti të mos dalë jashtë kontrollit.
“Ne dënojmë përshkallëzimin e situatës me Iranin brenda natës, bëjmë thirrje për përmbajtje dhe po i monitorojmë nga afër zhvillimet. Është jetike që konflikti në Lindjen e Mesme të mos dalë jashtë kontrollit”, shkroi ajo.
Naten mes 13 dhe 14 prillit 2024 Irani ndërmori një sulm paprecedentë me mbi 300 raketa balistike, lundruese dhe dronë kamikazë drejt Izraelit si hakmarrje ndaj sulmit në konsullatën e tij në Damask të Siri, më 1 prill. Forcat izraelite në bashkëpunimin me aleatët e SHBA-në arritën të zbrapsin 99% e sulmit, duke rrëzuar “shumicën dërrmuese”-deklaroi Zëdhënësi i Forcave të Mbrojtjes të Izraelit, kundëradmirali Daniel Hagari.
