Ambasada e SHBA-së në Shqipëri ka reaguar në lidhje me sulmet që kanë ndodhur kohët e fundit nga politika dhe jo vetëm, ndaj gazetarëve.
Ambasada e SHBA ka publikuar fjalët e ambasadores Yuri Kim, e cila është rreshtuar në mbrojtje të gazetarëve dhe punës së tyre.
Ambasadorja Kim është shprehur edhe më herët se SHBA është në mbështetje të rolit të gazetarëve. Sipas ambasadores, gazetarët nuk duhet të sulmohen, apo të kërcënohen, sepse bëjnë pyetje të vështira dhe tregojnë faktet.
“SHBA mbështesin rolin jetik të gazetarëve në të gjithë botën, përfshirë Shqipërinë. Ata janë burim i llogaridhënies dhe informacionit. Ata janë thelbësorë për demokracitë. Ata nuk duhet të sulmohen apo të kërcënohen sepse bëjnë pyetje të vështira dhe tregojnë faktet”, ka thënë ambasadorja e SHBA-së, Yuri Kim.
Kujtojmë segjatë javëve të fundit, gazetari i Report Tv, Adriatik Doçi, është “sulmuar” disa herë nga presidenti Ilir Meta.
Gazetari i Report Tv publikoi një shkrim mbi dhënien e nënshtetësive nga Meta, ku shkruhej se Presidenti u kishte dhënë nënshtetësinë personave të dënuar për vrasje, ose të akuzuar për falsifikim dokumentesh.
Pas publikimit të këtij artikulli, presidenti Meta u kundërpërgjigj duke bërë publike disa mesazhe private të gazetarit me deputetë të PS-së, të cilit i kërkonte punë si mësuese në Kamëz për bashkëshorten e tij./GazetaReforma.com/
