Një sulm tjetër ka ndodhur këtë të premte në Paris, pranë ish-zyrave të redaksisë së Charli Hebdo në Paris, pikërisht në vendin ku ndodhi një sulm terrorist në vitin 2015 pas publikimit të karikaturave të profetit të myslimanëve Muhamedit, nga gazeta satirike.
Kryeministri francez Jean Castex, pas marrjes së lajmit që një sulm ishte kryer pranë ish-zyrave të redaksisë së Charli Hebdo, ndërpreu një fjalim të planifikuar në një takim, duke thënë se një “ngjarje e rëndë” sapo kishte ndodhur në kryeqytet.
“Një sulm me thikë u krye në lagjen 11 përpara ish-zyrave të Charlie Hebdo”, tha kryeministri Castex, duke shtuar se dy nga të plagosurit ishin në gjendje kritike.
Një i dyshuar u arrestua pak pas sulmit me thikë që ndodhi pranë ish-zyrës së revistës satirike Charlie Hebdo, nga autoritetet policore.
Mediat franceze BFM TV dhe Le Figaro raportuan i dyshuari u prangos në shkallët e shtëpisë së operës Bastille në Paris.
Emmanuel Grégoire, nënkryetari i Komunës së Parisit, në një postim në Twitter u bëri thirrje njerëzve të shmangin lagjen Richard-Lenoir – ku Charlie Hebdo kishte zyrat e saj para sulmit terrorist në janar 2015 që la të vdekur 12 persona.
Ndërkohë grupimi terrorist i Al Qaedas, gjatë kohëve të fundit kishte lëshuar kërcënime të reja kundër redaksisë së gazetës satirike Charlie Hebdo, e cila u zhvendos pas sulmit në zyra më të sigurta diku pranë qendrës.
Kërcënimet erdhën sërish pasi gazeta satirike ribotoi karikaturat satirike të Profetit Muhamed në hapjen e gjyqit të disa personave të akuzuar që kishin ndihmuar sulmuesit gjatë sulmit terrorist të vitit 2015.
