Dosja e SPAK zbulon ndikimin e Suel Çelës, një nga figurat kryesore të krimit në Elbasan, mbi Gjykatën e këtij qyteti.
Sipas hetimeve, Çela kishte krijuar lidhje të ngushta me gjyqtaren Pajtime Fetah, por gjithashtu ka rekrutuar dhe ndikuar te gjyqtarja Enkeleda Kapedani, e njohur si “gjyqtarja e Tik-Tokut” për shkak të videove të saj të publikuara në rrjetet sociale, të cilat ngjallën debat për etikën profesionale.
Në dosje thuhet se Suel Çela i kishte ofruar Kapedanit një automjet me vlerë 40 mijë euro për t’u tërhequr nga gara për kryetare të gjykatës, duke synuar që pozicioni t’i kalonte Pajtime Fetah, e cila vepronte nën urdhrat e tij.
Megjithëse Kapedani shprehu mirënjohje dhe respekt për Çelën, ajo nuk pranoi ofertën, duke vënë përparësi ambiciet e saj në karrierën gjyqësore.
Për më tepër, Çela, në bashkëpunim me Pajtime Fetah dhe kryetarin e atëhershëm të gjykatës, Zihni Shahu, arrin të sigurojë që një çështje penale e tij të kalonte për shqyrtim te Kapedani.
Gjyqtari Tomorr Kullolli, i cili refuzoi të merrte përsipër çështjen, dha dorëheqjen, e cila u pranua nga Shahu.
Pas kësaj, dosja i kaloi Kapedanit, e cila më 30 prill 2020 vendosi të pushonte çështjen kundër Marjus Lulaj, identifikuar si vetë Suel Çela.
Enkeleda Kapedani akuzohet për moskallëzim krimi, për shkak të mosdenoncimit të ofertës prej 40 mijë eurosh, si dhe për korrupsion, duke marrë vendime nën ndikim të paligjshëm.
Ndërkohë, dyshimet ngrihen për faktin që SPAK nuk ka marrë masa ndaj saj, ndërsa gazetari Elton Qyno, që raportoi për këtë rast, është përballur me akuza, edhe pse veprimet e tij lidhen thjesht me kryerjen e detyrës së tij si gazetar.
