Suedezët nën 65 vjeç që kanë bërë një dozë të vaksinës COVID-19 të AstraZeneca do të marrin një vaksinë tjetër për dozën e tyre të dytë, tha të martën Agjencia Suedeze e Shëndetësisë. Suedia ndaloi përdorimin e vaksinës AstraZeneca në Mars pas raporteve për mpiksje të rrallë, por serioze të gjakut midis njerëzve që kishin marrë atë vaksine. Më vonë rifilloi përdorimin e vaksinës së AstraZeneca, por vetëm për njerëzit e moshës 65 vjeç ose më lart.
“Ne kemi arritur në përfundimin se njerëzit nën 65 vjeç që janë vaksinuar tashmë me AstraZeneca rekomandohet të marrin një dozë të dytë të vaksinës mRNA, të tilla si Pfizer ose Moderna,” tha Kryepidemiologu Anders Tegnell në një konferencë shtypi.
Ai tha se përfitimet e vaksinës AstraZeneca tejkaluan qartë rreziqet për njerëzit mbi 65 vjeç. Suedia, e cila ka shmangur bllokimet gjatë gjithë pandemisë, është në mes të një vale të tretë të pandemisë që po tendos sistemin e kujdesit shëndetësor.
Vendi regjistroi 16,692 raste të reja me koronavirus që nga e Premtja, treguan të martën statistikat e agjencisë shëndetësore, një rënie krahasuar me 19,105 raste gjatë periudhës përkatëse javën e kaluar.
Ndërsa rastet kanë qenë të larta, Agjencia e Shëndetësisë vlerëson skemën e vaksinimit për mbajtjen relativisht të ulët të numrit të vdekjeve në javët e fundit. Më shumë se 265,000 njerëz kanë bërë një vaksinë që nga e Premtja, që do të thotë 23.1% e popullsisë mbi 18 vjeç kanë marrë të paktën një injeksion.
Vendi me 10 milion banorë regjistroi 37 vdekje të reja, duke e çuar gjithsej në 13,825. Vdekjet e regjistruara kanë ndodhur gjatë disa ditëve dhe nganjëherë javëve. Shkalla e vdekjes së Suedisë për frymë është shumë herë më e lartë se ajo e fqinjëve të saj nordikë, por më e ulët se në shumicën e vendeve evropiane që vendosën bllokimet.
