Omicron ka zëvendësuar pothuajse plotësisht variantin e mëparshëm dominues të Covid-19 në Angli, Deltan. Sipas një studimi të ri, shumica dërrmuese e rasteve të reja me Omicron mund të jenë ri-infektime.
Studimi React nga Imperial College London – i cili është përditësuar çdo muaj që nga maji i vitit 2020 dhe financohet nga qeveria e Mbretërisë së Bashkuar – analizoi 100,607 rezultate të testeve PCR nga e gjithë Anglia. Tamponët u mblodhën në periudhën 5 – 20 janar.
Studimi zbuloi se 99% e tamponëve pozitivë ishin infektime me variantin Omicron, ndërsa vetëm 1% e infektimeve ishin të shkaktuara nga varianti Delta.
“Vumë re nivele të paprecedenta të infektimeve me SARS-CoV-2 në Angli në janar të vitit 2022 dhe indentifikuam se varianti Delta është zëvendësuar pothuajse plotësisht nga Omicron”, thanë autorët e studimit në punimin e tyre që u publikua të mërkurën.
Mundësia për ri-infektim
Dy të tretat e 3,582 pjesëmarrësve në studim, të cilët rezultuan pozitivë në janar, raportuan se kishin rezultuar pozitivë për Covid edhe në të kaluarën. Përveҫ tyre, 7.5% e të infektuarve thanë se dyshonin që ishin infektuar në të kaluarën, por nuk e kishin konfirmuar këtë me një test.
Kur variantet e mëparshme të Covid ishin në qarkullim, mendohej se infektimi i mëparshëm nga virusi mund të ofronte njëfarë mbrojtjeje nga ri-infektimi. Por, ekziston mundësia që të mos jetë ky rasti me variantin Omicron, sepse zyrtarët e shëndetësisë në Mbretërinë e Bashkuar vlerësuan në dhjetor se rreziku i ri-infektimit me Omicron është 5.4 herë më i lartë se sa me variantin Delta.
Studiuesit theksuan të mërkurën se aftësia infektuese e Omicron ishte më e larta nga të gjitha variantet Covid të marra në shqyrtim në studimin React.
“Vaksinimi (sëbashku me fushatën e dozave përforcuese) mbetet shtylla kryesore e mbrojtjes kundër Covid-19, duke pasur parasysh nivelet e larta të mbrojtjes që ofrojnë vaksinat kundër shtrimit në spital,” tha ekipi i studiuesve.
“Sidoqoftë, mund të nevojiten masa shtesë përtej vaksinimit, nëse rastet e infektimeve me Omicron vazhdojnë të mbeten në nivele shumë të larta. Kjo pavarësisht faktit se Omicron ka më pak gjasa të shkaktojë sëmundje të rëndë.”
Omicron është një variant shumë infektues i Covid-it, me një numër të madh mutacionesh. Ai është identifikuar nga autoritetet shëndetësore në të paktën 171 vende dhe ka sjellë një numër rekord të rasteve në shumë shtete.
BA.2, “variant nën investigim”
Studimi i Imperial College zbuloi gjithashtu se 0.4% e testeve pozitive ishin shkaktuar nga linja BA.2 e variantit Omicron.
Sipas OBSH-së, infektimet me Omicron aktualisht përbëhen nga katër nënvariante. Ndërsa linja BA.1 është ajo që dominon aktualisht, tendencat në Indi, Afrikën e Jugut dhe Danimarkë tregojnë se BA.2 po bëhet më i përhapur.
Javën e kaluar, Agjencia e Sigurisë Shëndetësore në Mbretërinë e Bashkuar e përcaktoi BA.2 një “variant nën investigim”, raportoi Sky News, pavarësisht se rastet e infektimeve nga kjo linjë mbeten ende të pakta./ CNBC
