Tashmë që beteja e Kinës me COVID-19 mund të konsiderohet e fituar, pasi për të dytën ditë radhazi nuk është shënuar asnjë rasti i ri i infektuar, kinezët u janë dedikuar studimeve të ndryshme rreth virusit.
Së fundmi,në American Journal of Gastroenterology është publikuar një studim sipas së cilit, gjysma e pacientëve me Coronavirus në spitalet e provincës kineze Hubei, ankoheshin si fillim për probleme me tretjen.
Kështu, ata arritën në konkluzionin se problemet me tretjen, mund të jenë shenja e parë e Coronavirusit për shumë pacientë.
Kërkuesit kanë zbuluare se 48.5% e 204 pacientëve që janë analizuar në studim janë shprehur se shenja e tyre e parë ishte probleme si diarrea, të vjellat dhe dhimbje abdominale.
Një numër më i vogël i këtyre rasteve, 7%, raportuan edhe probleme respiratore, që është edhe një nga simptomat më të zakonshme të lidhura me virusin.
Sipas studiuesve, zbulimet e reja kanë një rol të rëndësishëm pasi mund të ndihmojnë specialistët në zbulimin e virusit dhe mjekët mund të lëvizin më shpejt për të karantinuar këta pacientë, duke ndihmuar në ngadalësimin e përhapjes së pandemisë.
Ky studim bie ndesh me teorinë që është përsëritur më shumë deri tani, se shenjat kryesore të COVID-19 janë temperatura, kolla e thatë dhe problemet me frymëmarrjen.
Numri total i viktimave në rang botëror deri tani është 11, 299 persona dhe janë 271, 670 të infektuar në 183 vende, teksa deri tani në vendin tonë kanë humbur jetën 2 persona dhe janë infektuar 70 të tjerë, teksa në Kosovë janë 24 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
