Më shumë njerëz në pjesë të ndryshme të botës janë të rrezikuar nga përmbytjet ekstreme, sipas një studimi.
Këtë verë përmbytjet kanë qenë vdekjeprurëve në shumë vende, ndërsa në Gjermani, ato morën jetën e të paktën 173 njerëzve. Në Nigeri, Lagos Island përjetoi një nga përmbytjet e tij më të këqija vitet e fundit, duke zhytur makina dhe shtëpi. Dhe, në fillim të kësaj jave, zyrtarët njoftuan se numri i të vdekurve nga përmbytjet e korrikut në Kinë ishte rritur në 302 – më shumë se trefishi i vlerësimit të mëparshëm.
Përmbytjet ekstreme po përkeqësohen edhe nga ndryshimi i klimës, thotë një studim i revistës “Nature”. Përfundimet janë se popullsia e ekspozuar ndaj përmbytjeve që nga viti 2000 është 10 herë më e lartë se vlerësimet e mëparshme, pasi më shumë njerëz migrojnë në zona të prirura nga përmbytjet.
Nga viti 2000 deri në 2015, përafërsisht 58 deri në 86 milionë njerëz u zhvendosën në rajone të prirura nga përmbytjet, që përkthehet në një rritje afërsisht 20% të popullsisë së ekspozuar ndaj përmbytjeve. Përmbytjet dhe numri i njerëzve të ekspozuar ndaj tyre do të vazhdojnë të përkeqësohen, zbuloi studimi. Tridhjetë e dy vende tashmë po përjetojnë përmbytje në rritje dhe 25 vende të reja do t’i shtohen asaj liste deri në vitin 2030, nëse emetimet e gazrave serë nuk frenohen ndjeshëm, konstatuan studiuesit.
Komunitetet me të ardhura të ulëta janë shpesh më të rrezikuarat, pasi ato nuk kanë zgjidhje tjetër veçse të vendosen në zona më pak të favorshme, më pak të shtrenjta që janë më të prirura për përmbytje.
