Edhe sot studentët nuk kanë lënë pa dalë në protestë si ditët e tjera. Ata nuk heqin dorë nga qëllimet e tyre pasi nuk morën përgjigje pozitive për plotësimin e 8 kërkesave që i kanë drejtuar qeverisë.
Për këtë arsye studentët janë ngritur prap sot në protestë duke u mbledhur përpara Kryeministrisë dhe para Ministrisë së Arsimit.
Disa studentë kanë kaluar natën para kryeministrisë pavarsisht temperaturave të ulta dhe shprehen se janë të vendosur dhe njëkohësisht edhe të lodhur që u cënohet e drejta e tyre në këtë mënyrë.
Paralelisht vazhdojnë edhe protestat duke bojkotuar mësimin edhe në Shkodër, Korçë, Gjirokastër dhe Elbasan.Grupe studentësh po organizohen nga rrethet për të marshuar drejt kryeqytetit.
Burime për “gazetareforma.com” na bëjnë me dije se në Elbasan, studentët kanë bllokuar qarkullimin e mjeteve duke u ulur këmbëkryq në rrugë kryesore dhe shprehen se do vazhdojnë protestën. Ata thonë që janë aty për të drejtat e veta dhe nuk do të ndalojnë derisa të plotësohen kërkesat.
Sakaq, në kryeqytet vazhdon protesta në mënyrë paqësore me libra nëpër duar dhe fleta të bardha. Ata shprehen se janë gati të dialogojnë me kryeministrin vetëm pasi ai të plotësojë kërkesat e tyre.
“Do dialogojmë me qeverinë vetëm pasi Rama të na plotësojë kushtet tona.”- shprehen studentët.
