Që prej dekadës që kaluam, numri i studentëve në Universitetet Publike në Shqipëri, ka qenë gjithmonë në ulje drastike.
Problemet me mosakreditimin e shumë degëve në fakultete, apo shkrirja e shumë degëve të tjera për shkak të mosfrekuentimit nga studentët në Universitetet Publike, ka bërë që masa studentore të shkojë drejt Universiteteve (diplomoreve) private.
Kujtojmë se këtë vit të ri akademik, në universitetin e Elbasanit janë regjistruar 1032 studentë përkundrejt 2800 kuotave të lira. Thuajse gjysma e studentëve me një shifër prej 468 janë regjistruar në degët e Infermierisë duke e bërë këtë fakultet lokomotivën e këtij Universiteti.
Ndërkohë në fakultetet e tjera situata është njësoj e zymtë. Janë plot 13 degë që mbyllen dhe 10 të tjera që shpresojnë tek raundi i dytë. Situata më katastrofike është në fakultetin e shkencave humane, ku janë të sigurta për mbyllje pasi kanë nga 0 deri në 3 studentë të regjistruar degët: Histori dhe gjuhë gjermane, gjeografi dhe gjuhë italiane, gjuhë gjermane, gjuhë frënge, gjuhë italiane, gjuhë shqipe dhe rome, gjuhë shqipe dhe frënge, biologji kimi, matematikë fizikë, fizikë kompjuterike, matematikë informatikë, edukim qytetar, filozofi sociologji.
Situata duket jo e mirë në mjaft degë të tjera që kanë 5 apo 6 te regjistruar ndoshta ndonjë më shumë por që nuk kapin numrin 10 që shpresojnë pedagogët për siguri në hapje. Këto degë janë: Gjuhë shqipe dhe letersi, histori dhe gjeografi, gazetari, gazetari dhe gjuhë angleze, operator turistik të gjuhës gjermane, logopedi, arsim fillor, arsim parashkollor, psikologji, ekonomi turizëm.
Mesatarja 7.5 i ka dhënë një goditje të madhe Universitetit të Normales duke e çuar drejt zhdukjes mësuesinë në “Aleksander Xhuvani. Fakulteti i Edukimit ka situatë pesimiste së bashku me atë të Shkencave humane dhe të Shkencave të Natyrës.
Ndërkohë Fakulteti ekonomik dikur më i preferuari tani është në rënie të lirë. Fakulteti ku regjistroheshin çdo vit 900 studentë është në kuotën 185. As drejtësia e cila u reklamua aq shumë nuk i kaloi dot 50% te kuotave.
E njëjta situatë paraqitet edhe në Universitetin e Durrësit, Vlorës, Gjirokastrës, Shkodrës dhe Korçës.
Për këtë vit akademik vetëm shtesat e formularit të fundit, arritën që të shpëtojnë 13 degë nga shkrirja në Universitetin Bujqëësor të Tiranës, pasi rrezikonin mosplotësimin e kuorumit prej 20 studentësh.
Duket sikur kjo braktisje e madhe e studentëve ndaj Universiteteve Publike, vjen përpos të tjerash, edhe për shkak të dobësimit të strukturave universitare, dobësimit të mësimdhënies, korrupsionit, burokracisë. Mirëpo duket sikur kjo gjë është duke çuar “ujë në mulli” të Universiteteve Private./GazetaReforma.com/
