Ambasadorja amerikane Yuri Kim ka reaguar në lidhje me pranimin e refugjatëve afganë nga Shqipëria. Në një postim në Twitter, Kim shkruan se kur ka më shumë rëndësi, populli shqiptar tregon nder, guxim dhe mirësi. Kim thotë se SHBA është krenare ta quajë Shqipërinë mikun dhe aleaten e saj.
“BESA – kur ka më shumë rëndësi, populli shqiptar tregon gjithmonë nder, guxim dhe mirësi. Ne jemi krenarë t’ju quajmë mikun dhe aleatin tonë”, shkruan Kim në Twitter.
BESA – when it matters most, the Albanian people always show honor, courage and kindness. We are proud to call you our friend and Ally. 🇺🇸 🇦🇱 https://t.co/OS3sE263mH
— Ambassador Yuri Kim (@USAmbAlbania) August 15, 2021
Kujtojmë se ditën e sotme kryeministri Edi Rama konfirmoi se qeveria amerikane i ka kërkuar vendit tonë që të vlerësojë nëse mund të shërbejë si vend tranzit, për një numër emigrantësh politikë nga Afaganistani, që kanë SHBA-të si destinacion përfundimtar. Rama tha se nuk ka dyshime që vendi ynë nuk mund të thotë jo, dhe kjo jo sepse na e kanë kërkuar aleatët, por sepse vendi ynë nuk ia përplas derën në fytyrë të panjohurve që troksin për mbrojtje.
Edhe kreu i opozitës, Lulzim Basha u deklarua pro strehimit të emigrantëve afganë në Shqipëri, si një përmbushje e detyrimeve ndërkombëtare të vendit tonë, duke thënë se empatia dhe solidariteti ndaj atyre që janë duke luftuar për një rend demokratik në Afganistan, nuk mund të mungojë.
