Ambasadorja e Shteteve të Bashkuara të Amerikës, Yuri Kim ka reaguar në lidhje me evakuimet e qytetarëve afganë. Me anë të një postimi në rrjetet sociale, diplomatja amerikane tha se është bërë punë e palodhshme nga ana e SHBA-ve. “Me ndihmën e miqve si Shqipëria, ne kemi zhvendosur 124,000 njerëz në vend të sigurt, përfshirë 6,000 qytetarë amerikanë”, ka thënë Kim.
Ambasadorja Kim, mes të tjerash ka përmendur edhe kontributin që ka dhënë Shqipëria në këtë proces.
“SHBA mobilizoi një përpjekje të madhe, globale përmes kanaleve diplomatike për të evakuuar qytetarët amerikanë, personelin nga vendet partnere dhe afganët në rrezik. Me ndihmën e miqve si Shqipëria, ne kemi zhvendosur 124,000 njerëz në vend të sigurt, përfshirë 6,000 qytetarë amerikanë”, -shkruan ambasadorja.
Sjellim në vëmendje se në vendin tonë deri më tani kanë ardhur tre grupe me qytetarë afganë. Ata janë strehuar në struktura hotelerie në dy qytete në Durrës dhe Lezhë. Po ashtu grupet që mbërrijnë qëndrojnë përkohësisht në Qytet Studenti. Kryeministri Edi Rama ka bërë me dije se në vendin tonë do të vijnë rreth 4 mijë afganë.
Që prej marrjes së kontrollit nga talebanët, mijëra qytetarë afganë u detyruan të braktisnin vendin e tyre. Talebanët përparuan me shpejtësi në kryeqytetin e vendit Kabul. Forcat amerikane u larguan pas 20 vitesh nga Afganistani më 31 gusht.
