Qendër mbrojtësi i Barcelonës, Gerard Pique në një intervistë të dhënë së fundmi për spanjollen “La Vanguardia” ka folur shumë në lidhje me atë që po ndodh në ekipin e tij dhe qëndrimin që presidenti Josep Maria Bartomeu po mban ndaj kolegut të tij Lionel Messi.
Sipas tij një legjendë si Lionel Messi nuk duhet ta mendojë asnjëherë largimin nga Barcelona dhe duhet bërë gjithçka për t’u arritur një marrëveshje, madje edhe stadiumi i Barcelonës duhet ta mbaj emrin e tij.
“Çështja Messi? Po të isha presidenti do të kisha vepruar ndryshe. Nuk kam pasur shumë kontakte me të ato ditë sepse mendova se ishte një vendim shumë personal. Mbaj mend diçka kur i thash: Leo, është një vit, dhe më pas vijnë njerëz të rinj.Një lojtar i cili për 16 vjet ka dhënë kaq shumë… je i detyruar të bësh një marrëveshje me të. Stadiumi i ri duhet të ketë emrin e tij dhe më pas të sponsorit. Ne duhet t’i ruajmë figurat tona, jo t’i diskreditojmë ato.Më habit fakti që njerëz si Guardiola, Xavi, Puyol ose Valdes nuk janë në klub. Ju duhet t’i mbani ata, janë pjesë e historisë”.
