Largimi i mjekëve nga Shqipëria është kthyer në një faktor shqetësues. Shumë të rinj, sapo përfundojnë studimet nisen drejt gjermanisë për paga më të mira dhe kushte më të mira.
Rrjeti publik televiziv gjerman, ARD, publikoi një reportazh për largimin e mjekëve të rinj nga Shqipëria. Destinacioni kryesor i tyre është Gjermania.
ARD raporton se mjekët e rinj nuk shohin asnjë të ardhme në Shqipëri.
Sipas ARD, pyetja e parë që u bëhet mjekëve të rinj në Shqipëri është: Kur do të largohesh ti?’
Dea Guri, e cila studion mjekësi në Tiranë, tha për ARD se vendi nuk premton shumë.
“Të rinjtë nuk paguhen mirë. Paga minimale shkon 700 deri në 800 euro. Përveç kësaj mungojnë pajisjet diagnostikuese dhe investimet në spitale dhe qendrat shëndetësore. Një mjek i ri është përballë shumë sfidave. Kushtet në spitale janë skandaloze”, tha ajo.
“Çdo njeri që mbetet në Shqipëri duhet të luftojë shumë. Askush nuk e lë Shqipërinë me dëshirë. Askush nuk do të shkojë në Gjermani apo në ndonjë vend tjetër”, shtoi Guri.
Sipas ARD, gjithmonë e më pak mjekë po ngelen në Shqipëri. Sipas OECD, në BE ka mesatarisht 5 mjekë për 1 mijë banorë. Në Shqipëri janë më pak se 2.
ARD gjithashtu ka intervistuar edhe mjekun tjetër, Malbor Duka, i cili braktisi Shqipërinë për të shkuar në Gjermani.
Malbor Duka studioi prej muajsh për të shkuar në Gjermani si mjek. Sipas ARD, ai nuk e ka ndërgjegjen e pastër, pasi e di se me largimin e tij, në Shqipëri do ketë një mjek më pak.
“Zgjedhja ime e parë është Shqipëria, nëse do të ishin kushtet, nuk do e lija vendin, sepse i përkas këtij vendi. Por jam në një pikë të jetës sime që duhet të marrë një vendim për të ardhmen time”,tha ai, teksa largohet nga Rinasi në drejtim të Gjermanisë.
