Niveli “shumë i lartë” i infeksionit Covid në Angli është një “shqetësim në rritje” ndërsa Ministria e Shëndetësisë lufton për të përballuar rritjen e numrit të pacientëve, deklaroi një zyrtar shëndetësor.
Të hënën u shënua një rekord 41,385 raste Covid dhe 357 vdekje.
Autoritetet në Angli thanë se numri i njerëzve që trajtohen për virusin në spital është tani 20,426, që është më i lartë se kulmi i mëparshëm prej rreth 19,000 në Prill.
Zyrtarët shëndetësorë në Uells dhe Skoci kanë thënë gjithashtu se ata rrezikojnë të mbingarkohen.
Shifra e së hënës për rastet e reja është numri më i lartë ditor i raportuar nga qeveria e Mbretërisë së Bashkuar dhe hera e parë që totali ditor ka kapërcyer 40,000.
Mendohet se shkalla e infeksionit ishte shumë më e lartë gjatë pikut të parë në Prill, por kapaciteti i testimit ishte shumë i kufizuar për të zbuluar numrin e vërtetë.
Disa të dhëna gjatë periudhës së Krishtlindjes janë të paplota, si rezultat i disa ndërprerjeve të shërbimeve.
Gazetari i BBC, Hugh Pym tha se shifra e së hënës përfshinte edhe rastet ku raportimi është vonuar, por që zyrtarët nuk mohuan që të kishte pasur një rritje të konsiderueshme të infeksioneve.
Dr Yvonne Doyle, drejtore mjekësore në Shëndetin Publik në Angli, tha: “Ky nivel shumë i lartë i infeksionit është shqetësues në një kohë kur spitalet tona janë më të prekshmet, me pranimet e reja që rriten në shumë rajone.”
“Pavarësisht niveleve të pashembullta të infeksionit, ka shpresë në horizont,” shtoi ajo.
Spitalet në Uells, Skoci dhe në jug të Anglisë kanë raportuar rritje të presionit mbi shërbimet e tyre ndërsa numri i pacientëve Covid rritet.
Spitali Mbretëresha Elizabeth në Woolwich, në jug-lindje të Londrës, tha të hënën se numri i të shtruarve kaloi mbi “numrin e tij kufi të pacientëve pozitivë Covid”.
“Të gjithë pacientët tanë kanë marrë trajtimin e duhur, duke përfshirë trajtimin e kujdesit intensiv për Covid-19 dhe terapinë me oksigjen siç kërkohet. Ne po vazhdojmë të monitorojmë situatën për të siguruar që kjo të mbetet kështu”, tha një zëdhënës i Spitalit.
/Gazetareforma.com/
