Spanja ka miratuar një ligj për të legalizuar eutanazinë, duke u bërë vendi i katërt në Evropë që lejon njerëzit t’i japin fund jetës së tyre në disa rrethana.
Belgjika, Luksemburgu, Hollanda, Kanada dhe Kolumbia janë të vetmet vende të tjera në të cilat eutanazia aktualisht është e ligjshme.
Dhoma e ulët e parlamentit e Spanjës miratoi ligjin me mbështetjen nga partitë e qendrës dhe të majta të enjten.
Ligji lejon të rriturit me sëmundje “serioze dhe të pashërueshme” që shkaktojnë “vuajtje të padurueshme” të zgjedhin t’i japin fund jetës së tyre.
Ai pritet të hyjë në fuqi në qershor. Para miratimit të ligjit, ndihma për dikë që të vdiste në Spanjë ishte potencialisht e dënueshme me një burg deri në 10 vjet.
“Sot ne jemi bërë një vend më njerëzor, më i drejtë dhe më i lirë,” shkroi kryeministri spanjoll Pedro Sánchez vetëm disa minuta pas votimit. “Ligji i eutanazisë, i kërkuar gjerësisht nga shoqëria, më në fund është bërë një realitet.”
Miratimi i ligjit u festua nga aktivistët, por u dënua nga grupet konservatore dhe fetare.
Çfarë lejon ligji?
Ligji spanjoll lejon dy mënyra vullnetare për të lejuar një person që t’i japë fund jetës së tij: eutanazia dhe vetëvrasja e asistuar. Eutanazia është akti i përfundimit me qëllim të një jete për të lehtësuar vuajtjet – për shembull një injeksion vdekjeprurës i administruar nga një mjek. Në rastet e vetëvrasjes së asistuar, veprimi ndërmerret nga vetë personi me ndihmë.
Për te bërë një nga të dyja, personat duhet që të:
- vuajnë një “sëmundje serioze ose të pashërueshme” ose një gjendje “kronike ose të paaftë” që shkakton “vuajtje të patolerueshme”
- të jetë një shtetas spanjoll i rritur ose një banor i ligjshëm
- të jenë “plotësisht të vetëdijshëm ” kur bëjnë kërkesën, e cila duhet të dorëzohet dy herë me shkrim, me 15 ditë më parë.
Një mjek mund të refuzojë kërkesën nëse kushtet nuk janë përmbushur. Po ashtu kërkesa duhet të aprovohet nga një mjek i dytë dhe nga një organ vlerësues. Çdo mjek mund të tërhiqet për shkak të “ndërgjegjes” nga marrja pjesë në procedurë.
