Prokuroria e Posaçme ka regjistruar emrin e zëvendëskryeministres Belinda Balluku si person nën hetim për akuzën e shkeljes së barazisë në tendera. Burime nga organi i akuzës bëjnë me dije se numri dy i qeverisë “Rama 4” është thirrur të paraqitet në ambientet e SPAK të hënën, mbi bazën e një shkrese të firmosur nga prokurori i posaçëm Dritan Prenci. Fletëthirrja i është dorëzuar Ballukut në Ministrinë e Infrastrukturës dhe Energjisë.
Në dokument, zëvendëskryeministres i kërkohet të paraqitet e shoqëruar nga një avokat, një procedurë që tregon se mund t’i komunikohet një akuzë penale. Kjo nënkupton se SPAK mund ta ndjekë penalisht Ballukun pa kërkuar miratim nga Kuvendi, duke shmangur kështu masat e sigurimit.
Prokuroria e Posaçme nuk ka dhënë detaje të tjera mbi çështjen konkrete, por zyrtarja e lartë qeveritare është përballur më parë me disa kallëzime penale, përfshirë edhe hetimet mbi tenderin e tunelit të Llogarasë. Në këtë rast, kontrata e fituar nga një kompani turke u rrit me mbi 50 milionë euro krahasuar me vlerën fillestare.
Nuk dihet ende nëse Belinda Balluku do t’i përgjigjet thirrjes së SPAK dhe nëse do të vijojë të mbajë postet qeveritare apo do të zgjedhë të largohet për të zhvilluar betejën ligjore jashtë mburojës politike të Partisë Socialiste.
Balluku mban detyrën e zëvendëskryeministres që prej korrikut 2022, ndërsa drejton Ministrinë e Infrastrukturës dhe Energjisë që prej janarit 2019. Ajo është gjithashtu drejtuese politike e qarkut Fier, ku në zgjedhjet e 11 majit Partia Socialiste siguroi 12 mandate.
