Prokuroria e Posaçme ka dhënë sot pretencën për ish-kryetarin e Bashkisë së Bulqizës, Lefter Alla. SPAK ka kërkuar dënimin e tij me 3 vite e 6 muaj burg, por nga gjykimi i shkurtuar, dënimi përfundimtar i tij është 2 vite e 4 muaj. Gjithashtu pas kryerjes së këtij dënimi, ai do të dënohet që mos të ushtrojë asnjë funksion publik për 5 vite.
Ndërkohë, masa janë dhënë edhe për nëpunës të tjerë të bashkisë. Ndaj ish-nënkryetares së Bashkisë, Enkeleda Lleshi kërkohet 3 vite burg me gjykim te shkurtuar 2 vite dhe dënim plotësues që për 5 vite të mos ushtroje asnjë funksion publik.
Për Rubin Kolën janë caktuar 2 vite burg me gjykim te shkurtuar 1 vit e 4 muaj dhe 5 vite mos te ushtroje asnjë funksion publik.
Kujtojmë se Lefter Alla akuzohet se ka shkelur barazinë në tendera dhe ankande publike dhe ka shpërdoruar detyrën. Nga hetimi ka rezultuar se ai ka shkelur procedurat e prokurimit publik të 30 prillit 2021 për ndërtimin e rrjetit të furnizimit dhe të shpërndarës së ujësjellës-kanalizimeve, në Lagjen e Vjetër të qytetit të Bulqizës.
Ish-kryebashkiaku së bashku me zyrtarë të tjerë përgjegjës të bashkisë kanë krijuar avantazhe gjatë procedurës së prokurimit në mënyrë që garën ta fitonte kompania që donin ata.
