Pasditen e sotme pasi Prokuroria e Posaçme kundër Korrupsionit dhe Krimit të Organizuar kërkoi autorizim për arrestimin e deputetit të Partisë Socialiste, Alqi Bllako, Kuvendi i Shqipërisë ka njoftuar zyrtarisht se nesër do të zhvillohet mbledhja e Këshillit për Rregulloren, Mandatet dhe Imunitetin. Mbledhja, siç e paralajëmroi dhe kreu i grupit parlamentar të PS, Taulant Balla, do të zhvillohet nesër në orën 18:00 të pasdites.
“Ju njoftoj se nesër, më datë 30.03.2022, ora 18:00, në Kryesinë e Kuvendit, nën drejtimin e Kryetares së Kuvendit, znj. Lindita Nikolla, do të zhvillohet mbledhja e Këshillit për Rregulloren, Mandatet dhe Imunitetin të Kuvendit, për shqyrtimin e kërkesës së ardhur nga SPAK për dhënien e autorizimit për arrestimin e deputetit Alqi Bllako. (Urdhër nr. 22, datë 29.03.2022, i Kryetares së Kuvendit, znj. Lindita Nikolla,“-shkruhet në kthimin e përgjigjes.
Kujtojmë se ditën e sotme SPAK i ka kërkuar Kuvendit që t’i heqë imunitetin deputetit Alqi Bllako, si i përfshirë në aferën e inceneratorëve.
Gjithashtu SPAK i ka dërguar një shkresë Kuvendit të Shqipërisë, duke argumentuar të gjitha arsyet se përse kërkojnë arrestimin e tij.
Në shkresën drejtuar Kuvendit, shprehet se Bllako, në kohën kur ka shërbyer si Sekretar i Përgjithshëm në Ministrinë e Mjedisit, në bashkëpunim me persona të tjerë, ka kryer veprime të kundraligjshme me dashje në ndërtimin e inceneratorit të Fierit, duke shkaktuar një dëm prej 16.288.344 lekësh.
Gjithashtu vihet në dukje, se Bllako, ka favorizuar kompaninë koncensionare “Integrated Technology Ëaste Treatment”, kundrejt pranimit të një përfitimi të parregullt, në shumën e 14.964.900.
