Prokuroria e Posaçme kundër Korrupsionit ka shpallur pretencën për ish-kryetarin e Bashkisë Pogradec, Eduart Kapri, dhe dy ish-zyrtarë të kësaj bashkie, të akuzuar për shpërdorim detyre kryer në bashkëpunim.
SPAK ka kërkuar dënimin me 1.6 vite burg për Kaprin, por për shkak të gjykimit të shkurtuar, dënimi i tij u ul në 1 vit.
Hetimet kanë dokumentuar se Eduart Kapri, në cilësinë e Kryetarit të Bashkisë Pogradec, në bashkëpunim me Besmira Niko dhe Besjan Meço, kanë lejuar punime ndërtimi në kundërshtim me ligjin për një objekt 14 katësh nga shoqëria “Gedi” sh.p.k., e administruar nga vëllai i Kaprit, Gëzim Kapri.
Ky ndërtim përfshinte jo vetëm shtimin e dy kateve, por gjithashtu u lejua shtimi i një kati nëntokë dhe dy ambienteve shërbimi, duke përfshirë kështu një sipërfaqe ndërtimore të shtuar në kundërshtim me ligjin.
Në vitin 2016, Kapri miratoi një vendim që lejoi përfundimin e punimeve dhe shtimin e dy kateve për objektin, duke shkelur ligjin dhe duke krijuar përfitime të padrejta për shoqërinë “Gedi”. SPAK thekson se ky vendim është marrë në kushte konflikti të hapur të interesit nga ana e Kaprit.
