Prokuroria e Posaçme kundër Korrupsionit dhe Krimit të Organizuar ka goditur organizatën kriminal të Çopjave, në lidhje me trafikun ndërkombëtar të kokainës nga vendet e Amerikës Latine drejt Europës, me qëllim përfitimin e miliona eurove.
Ky grup kriminal, sipas njoftimit zyrtar të SPAK, është me bazë në Elbasan dhe ka tentuar të trafikojë në Evropë rreth 17 ton kokainë.
Lënda narkotike importohej kryesisht nga Paraguai përmes kontejnerëve detarë, të kamufluar në forma të sofistikuara si sapunë, bombola boje apo materiale ndërtimi, të etiketuara me emërtime të koduara si “Fox”, “Puma” apo “sy me rrufe”.
Për këtë rast, Gjykata e Posaçme ka lëshuar 16 masa sigurie, prej të cilave 14 janë “arrest me burg” dhe 2 “detyrim paraqitje”.
Deri tani janë ekzekutuar 10 masa arresti, ndërsa 6 persona janë ende në kërkim. Mes të arrestuarve janë Ervis Çela, i identifikuar si drejtuesi i grupit, si dhe vëllai i tij Ardian Çela, i cili vepronte nga Paraguai duke menaxhuar furnizimin me drogë nga prodhuesit në Amerikën Latine.
Të tjerë të arrestuar janë Petrit Lakatos, Renato Mullai, Gëzim Çela, Mariglen K., Elidon Çela dhe Franc Çopja, ky i fundit i ndaluar në Belgjikë.
Operacioni i SPAK është shoqëruar edhe me një seri sekuestrimesh pasurore. Janë vendosur nën sekuestro 14 pasuri të paluajtshme me vlerë të lartë financiare, përfshirë resortin “A….. Park” në Xhafzotaj të Durrësit dhe vilën “Elysian” në Dhërmi, me një sipërfaqe ndërtimi prej mbi 378 metra katrorë dhe një vlerë tregu që tejkalon 1 milion euro.
Ndër të tjera janë sekuestruar edhe truall dhe toka në zonën e Sharres në Tiranë, kuota në disa shoqëri tregtare që operonin në Durrës, Kavajë dhe Rrogozhinë, si dhe tre automjete.
Gjatë kontrolleve janë gjetur dhe sekuestruar gjithashtu 111 mijë euro cash, 4 mijë dollarë dhe 880 mijë lekë.
Një tjetër element i rëndësishëm i hetimit ishte mekanizmi i sofistikuar për pastrimin e parave. Organizata përdorte shoferë autobusësh që udhëtonin në linja ndërkombëtare për të sjellë para “cash” nga vendet e Bashkimit Evropian në Shqipëri.
Shoferët përfitonin një komision prej rreth 2% të shumës së transportuar, ndërsa grupi siguronte kështu rrjedhje të parave pa lënë gjurmë në sistemin bankar apo doganor.
Operacioni i udhëhequr nga SPAK është zhvilluar në bashkëpunim të ngushtë me EUROPOL, EUROJUST dhe me agjenci të specializuara nga Belgjika, Franca, Gjermania, Holanda dhe Italia. Policia Federale Gjyqësore belge, Policia Kombëtare Franceze, BKA gjermane, Policia holandeze dhe Shërbimi për Bashkëpunim Ndërkombëtar Policor në Itali kanë ndihmuar në koordinimin dhe zbatimin e hetimeve.
Mes emrave të njohur në këtë skemë kriminale figuron edhe Julian Balla, i njohur dhe me emrin Hysni Balla, person i shpallur në kërkim. Ai është identifikuar si pronar i resortit luksoz “Ajman Park” në Durrës dhe i vilës “Elysian” në Dhërmi, tashmë të sekuestruara nga autoritetet.
