Armando Ndreca, vëllai i deputetit të Partisë Socialiste Eduard Ndreca, do të dalë para Gjykatës së Posaçme pasi Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar çështjen për gjykim. Ndreca përballet me akuza për kultivim dhe trafikim të lëndëve narkotike, si dhe për pjesëmarrje në një grup të strukturuar kriminal.
SPAK e akuzon Armando Ndrecën për veprat penale të “Prodhimit dhe shitjes së narkotikëve”, kryer në kuadër të një grupi të strukturuar kriminal, bazuar në nenet 283/3 dhe 28/4 të Kodit Penal. Po ashtu, ndaj tij rëndojnë akuzat për “Grup të strukturuar kriminal” sipas nenit 333/a/1 dhe “Kryerjen e veprave penale nga organizata kriminale” të parashikuar nga neni 334/1 i Kodit Penal.
Nga hetimet e SPAK rezulton se Armando Ndreca ka pasur rol organizativ në një grup të përfshirë në kultivimin dhe shpërndarjen e 243 kilogramëve kanabis në vitin 2020 në zonën e Lezhës.
Ai u arrestua fillimisht në vitin 2024, pasi dyshohej se kishte marrë pjesë në kultivimin e bimëve narkotike, pas zbulimit të një stani të përshtatur si shtëpi bari në një fshat të Lezhës. Megjithatë, gjykata vendosi lirimin e tij, pasi nuk u gjetën prova të mjaftueshme që të vërtetonin përfshirjen e tij në atë rast, ku u arrestuan dy persona të tjerë.
Në janar të vitit 2025, Armando Ndreca u arrestua sërish gjatë operacionit “Revanshi”. Arrestimi u bë pasi ai rezultoi të ishte përfshirë në komunikimet e Sky Ecc për kultivimin e drogës. Vetëm një muaj para këtij arrestimi nga SPAK, ai ishte ndaluar nga Policia e Lezhës në lidhje me një serë ku kultivohej kanabis sativa.
SPAK ka ngritur ndaj tij akuzën për prodhim dhe shitje narkotikësh në kuadër të grupit të strukturuar kriminal. Në dosjen hetimore përfshihen edhe ish-deputeti Arben Ndoka dhe nipi i tij, Samuel Ndoka, të cilët janë objekt i të njëjtit urdhër ndalimi.
