SPAK ka dërguar për gjykim Bardh Spahinë, ish-kryetarin e Bashkisë Shkodër, i cili akuzohet për “Pengime për ekzekutimin e vendimeve të gjykatës” sipas nenit 320 të Kodit Penal.
Hetimet kanë zbuluar se Spahia ka marrë vendim për shkarkimin e administratorit të Ujësjellës Kanalizimeve, M.M., dhe emërimin e A.B., duke anashkaluar një vendim gjyqësor të Gjykatës së Rrethit Gjyqësor Shkodër, i cili kërkonte rivendosjen e M.M. në detyrë.
Gjykata kishte vendosur pezullimin e dy vendimeve të Spahisë deri në vendimin përfundimtar, por ai ka vijuar me vendime të tjera për të shkarkuar M.M. dhe emëruar A.B. Në këtë mënyrë, Spahia ka penguar ekzekutimin e vendimit gjyqësor, çka ka sjellë dërgimin e tij për gjykim.
SPAK thekson se mosrespektimi i vendimeve gjyqësore cënon shtetin e së drejtës dhe shkakton pasiguri juridike, duke shtuar se funksionarët publikë duhet t’i zbatojnë vendimet pa interpretime.
