Ditwn e sotme Bardh Spahia ka marrë mandatin e kryetarit të Bashkisë Shkodër. Në fjalën e tij në sallën e Këshillit Bashkiak Shkodër, Spahia tha se do të jetë kryetar i gjithë shkodranëve.
“Do të japim maksimumin që të kërkojmë mundësi të tjera për të shtuar investimet. Të bashkëpunojmë të gjithë bashkë për Shkodrën. Dera e Bashkisë Shkodër do te jetë e hapur për çdo shkodran pa asnjë dallim.” – u shpreh Spahia.
Bardh Spahia – Kryetar i Bashkisë Shkodër
Vij sot para jush me përgjegjësinë e besimit që më dhanë banorët e Shkodrës nga Shala në Velipojë, nga Ana e Malit në Gurin e zi, në qytet dhe njësitë administrative.
Falënderimi im është për të gjithë pa përjashtim, ata që më votuan dhe ata që për një arsye apo tjetër nuk votuan për mua. Unë kam bërë një premtim para banorëve të Shkodrës gjatë fushatës elektorale dhe e përsëris sërish para jush edhe sot: Do të jem kryetar i gjithë shkodranëve, pavarësisht zgjedhjes së tyre me 6 mars 2022.
T’i shërbej Shkodrës është nder por mbi të gjitha përgjegjësi e madhe për mua.
Është e vertetë që ky mandat që nis sot, është i shkurtër në kohë, por Ne do të japim maksimumin tonë, të gjithë bashkë, që jo vetëm të realizojmë projektet e prioritetet tona por të kërkojmë e të gjejmë edhe mundësi të tjera për të shtuar investimet dhe vëmendjen ndaj Shkodrës.
Kohën që kemi në dispozicion, duhet ta shfrytëzojmë në maksimum, siç edhe duhet të bashkëpunojmë të gjithë bashkë, pa asnjë dallim, për Shkodrën e shkodranët. Tani është momenti të nisim punën për shtëpinë tonë të përbashkët, për të ndërtuar të sotmen me veshtrimin nga e ardhmja.
Spahia fitoi në zgjedhjet e 6 marsit, teksa ishte përballë kandidatëve Xhemal Bushati dhe Majlinda Angoni.
