Para Parlamentit të Shqipërisë në shenjë proteste janë mbledhur disa qytetarë për të kundërshtuar projektligjin për Zonat e Mbrojtura.
Me banderolë në duar me mbishkrimin “mos votoni pr/ligjin masakrues për zonat e mbrojtura”, ata bëjnë thirrje që të mos kalojë në votim.
“Nesër nuk do të ketë më bregdet pasi do të jetë pronë private e disa individëve dhe do të kërkojnë shuma marramëndëse parash që ta shijoni natyrën tuaj, që fëmijët tuaj të luajnë ashtu si keni luajtur ju. Kjo është një masë që shkatërron të ardhmen e kombit, ajo i përket të gjithëve”, u shpreh një nga protestuesit në fjalën e tij.
Ligji për Zonat e Mbrojtura mori dritën jeshile në Komisionin parlamentar të Veprimtarisë Prodhuese. Në komision ligjin e shpjegoi ministrja e Turizmit Kumbaro, e cila tha se nuk ka asnjë shkelje të direktivave të Bashkimit Evropian.
Ditën e sotme në këtë seancë plenare do kalohet në votim ky projektligj si dhe marrëveshja mes Italisë dhe Shqipërisë për emigrantët, ndërsa projektligji për Amnistinë Penale nuk do të kalohet, pasi PS-ja vendosi ta heqë nga rendi i kësaj mbledhjeje.
Kujtojmë se për Amnistinë Penale për ta miratuar duhen 84 vota, që partia në pushtet duket se nuk po i siguron dot.
Ndërkohë, opozita ka paralajmëruar se nuk do të ketë një seancë normale as sot.
