Rinisin protestat në qytetin e Shkodrës. Sot në orën 11.00 pritet të nisë një protestë e thirrur nga shoqëria civile. Ndryshe nga java e kaluar, sot dhjetëra forca policie kanë marrë në ruajtje institucionet në Shkodër.
Javën e kaluar protesta e shoqërisë civile nisi paqësore, por në mesditë një grup të rinjsh e të miturish dogjën selinë e PS-së.
Kryetarja e Bashkisë Shkodër, Voltana Ademi akuzoi policinë se nuk ndërmori asnjë masë dhe nuk ndërhyri për të ndaluar këtë shkatërrim.
Grupi i protestuesve u futën brenda selisë së PS-së, nxorën gjithçka që kishte brenda, kompjutera, karrige e banderola dhe u vendosën flakën objekteve në rrugë. Forcat speciale kanë ndërhyrë me vonesë në Shkodër duke shpërndarë protestuesit me gaz lotsjellës dhe “spraj me piper”.
Kryetarja e Bashkisë së Shkodrës Voltana Ademi reagoi fuqishëm për mënyrën sesi po shkatërrohet qyteti.
“Është skandal shkatërrimi i selisë së Partisë Socialiste. Është e papranueshme. Keqbërës mund të ketë sa të duash, por kam përshtypjen se janë të futur”, – tha ajo. “Si ka mundësi nuk është aty Policia e Shtetit për të ruajtur institucionet?”, u shpreh Ademi.
/GazetaReforma.com/
