Sot pasdite (24 dhjetor) hyn në fuqi kufizimi i ndalim qarkullimit prej orës 20:30 – 06:00. Komitetit Teknik i Ekspertëve me një deklarate 3 ditë më parë përcaktoi se këto masa do të qëndrojnë deri më 4 janar, me qëllim parandalimin e përhapjes së koronavirusit në vend duke qenë se jemi dhe në prag të festave të fundvitit.
Pas kësaj date do të rikthehet sërish izolimi që prej orës 22:00 – 06:00. Të gjithë ata persona apo biznese që thyejnë këtë masë kufizuese do të gjobiten sipas aktit normativ.
Ministrja e Shëndetësisë, Ogerta Manastirliu, shpjegoi se “Përjashtim bëjnë ata që duhet të lëvizin për arsye shëndetësore apo pune”
“Edhe aktiviteti i bareve dhe restoranteve do të kufizohet në këtë fashë orare”, deklaroi Manastirliu.
Gjithashtu, ministrja njoftoi pezullimin e fluturimeve me Anglinë nga dita e djeshme, deri në 6 janar, duke shtuar se “rikthehet karantina 14-ditore për qytetarët që vijnë nga ky vend.
Këto masa të reja kanë patur kritika nga krerët e institucioneve fetare krishtere të cilët shprehen se kufizimet në prag Krishtlindjesh janë diskriminuese. Në një letër drejtuar Kryetares së komitetit të ekspertëve anti-COVID, Mira Rakacolli, Imzot Frendo shkruan se Kisha Katolike ishte përgatitur dhe kishte marrë të gjitha masat që mesha të kremtohej në orare të përshtatshme që t’u lejojnë njerëzve të kthehen nëpër shtëpitë e tyre para orës 22.00
Gjithashtu nga sot mbyllen dhe shkollat 9-vjeçare dhe gjimnazet për pushimet e dimrit dhe do të rihapen më 11 janar.
Në 24 orët e fundit në vendin tonë u raportuan 503 raste raste të reja dhe 6 humbje jete. Numri i të shëruarve ia ka kaluar infektimeve sot, ku janë shëruar 550 qytetarë.
/Gazetareforma.com/
