Mëngjesin e sotëm, në emisionin “Koha për t’u zgjuar”, ishte i ftuar në një lidhje të drejtpërdrejtë këshilluesi i mjekësisë holistike, Nikola Ndoni.
Ai foli mbi rolin jetik të baktereve në organizmin e njeriut, me fokus të veçantë te bakteret e mira që ndihmojnë në krijimin dhe ruajtjen e një flore të shëndetshme në trup.
Ndoni theksoi se njeriu është i destinuar të bashkëjetojë me bakteret, pasi ato janë pjesë e pandashme e sistemit tonë biologjik.
“Jemi të rrethuar dhe të varur nga bakteret, nuk mund të ndikojmë pa ato. Energjinë në trupin tonë e prodhon mitokondria që është një bakter që ka hyrë në organizmin tonë miliona vite më parë.”
Ai shtoi se ushqimet e përpunuara dhe jo të shëndetshme ushqejnë bakteret që dëmtojnë trupin, duke kontribuar në zhvillimin e shumë sëmundjeve që sot janë kthyer në epidemi.
“Shumë sëmundje që janë bërë epidemi, janë bërë pasi ne me ushqimet jo të shëndetshme që hamë ushqejmë bakteret që na bëjnë dëm.”
Sipas Ndoni, balanca bakteriale në zorrë është kyçe për shëndetin tonë, dhe ajo mund të përmirësohet nëpërmjet konsumit të ushqimeve probiotike.
“Ekuilibrat në zorrë vendoset nga bakteret e mira. Një nga ushqimet më të mira për bakteret janë ushqimet e fermentuara, që janë probiotikë. Përmendim lakrën turshi apo kosin. Edhe uthulla e mollës, një lugë esëll në mëngjes është shumë e mirë që të pihet.”
Ai ndau gjithashtu mendimin e tij për mënyrën e të ushqyerit në mëngjes, duke përmendur ushqimet më të përshtatshme për të nisur ditën.
“Ushqimi numër një që mund të konsumohet në mëngjes është veza, avokado, vaji i ullirit, mishi, peshku. Na thuhet në mëngjes hani tërshërë apo musli, ndërsa ajo plas edhe kafshën. Duhet shmangur sheqeri që në mëngjes. Na kanë këshilluar të kundërtën, na thuhet hani lehtë në mëngjes ndërkohë që në mëngjes trupi jonë është më i përgatitur të tresë, krahasuar me darkën.”
Ndoni i ftoi qytetarët të jenë më të ndërgjegjshëm për ushqimin dhe të mos bien pre e miteve të zakonshme për dietën, duke vënë theksin te rëndësia e ushqimeve natyrale dhe të pasura me vlera ushqyese.
