Mjeku fizioterapist Ilvi Begolli ka folur në emisionin “Health O’Clock” për sëmundjen e skoliozës, duke nënvizuar se kjo patologji është dukshëm më e përhapur te vajzat dhe mund të zbulohet që në shikim të parë përmes disa shenjave në trup.
Sipas Begollit, përveç testeve dhe metodave tradicionale të diagnostikimit, mjekët po përdorin gjithnjë e më tepër vëzhgimin e syve, dhëmbëve dhe këmbëve për të identifikuar raste të mundshme të skoliozës. Ai theksoi se këto elementë të trupit japin shpesh sinjale të qarta për prirjen ndaj kësaj sëmundjeje.
“Skoliozat fillojnë që në moshën 7-8 vjeç dhe kanë një zhvillim tjetër nga mosha 8 deri në 12 vjeç, ndërsa faza tjetër e rëndësishme është ajo 13-15 vjeç. Kjo është periudha kur ndodh përkeqësimi i skoliozës. Sipas statistikave, probabiliteti është 7 vajza për çdo një djalë. Arsyet janë të pashpjegueshme, por mendohet se lidhen me faktorë hormonalë dhe zhvillimin ndryshe të fundshpinës tek vajzat”, u shpreh ai.
Begolli shtoi se një ndër hapat e parë në ekzaminimin e një pacienti është vëzhgimi i tre elementëve kyç: syve, dhëmbëve dhe këmbëve. “Te fëmijët që kanë probleme me dhëmbët dhe nofullën, ekziston një rrezik më i lartë për të zhvilluar skoliozë. E njëjta vlen edhe për fëmijët që kanë një këmbë më të përkulur nga brenda dhe një tjetër normale – kjo krijon ndryshime në biomekanikën trupore dhe rrit mundësinë për të pasur skoliozë”, shtoi ai.
Mjeku shtoi gjithashtu se në disa raste më të rralla, skolioza mund të jetë pasojë e kushteve specifike shëndetësore. “Një dhimbje në veshkë, për shembull, mund të nxisë trupin të mbrohet dhe të çojë në një devijim postural. Ka fëmijë që lindin me një këmbë më të shkurtër dhe një tjetër më të gjatë, dhe kjo mund të shkaktojë skoliozë. Po ashtu, edhe fëmijët që kanë lindur me paraliza janë më të rrezikuar”, përfundoi Begolli.
