Një hetim i përbashkët mes autoriteteve belge dhe shqiptare ka zbuluar një skemë pastrimi parash ku trafikantët e drogës përdorin biznesmenë me profil të pastër për të legalizuar fitimet kriminale përmes investimeve në Shqipëri.
Në qendër të çështjes është Besjan Ramaj, 56 vjeç, i dënuar në Belgjikë për trafik narkotikësh, i cili sipas dosjes gjyqësore kishte investuar mbi 1 milion euro në pasuri të paluajtshme në Shqipëri duke përdorur si front biznesmenin Ardjan Malasi dhe kompaninë e tij “Ledio 04”.
Në një bisedë të përgjuar nga autoritetet belge në vitin 2019, Ramaj mburrej për pronat që kishte në vend: “Kam aty në Fier 17 hyrje, kam në Durrës nja 15, kam në Tiranë nja 7 dhe nja 3 dyqane”.
Sipas hetimit, paratë nga trafiku i drogës futeshin në qarkullim përmes biznesit të Malasit, duke u paraqitur si të ardhura të ligjshme dhe më pas përdoreshin për blerje pasurish të paluajtshme apo transferta bankare drejt Belgjikës.
SPAK thekson se kjo është një metodë gjithnjë e më e përdorur nga krimi i organizuar, ku persona pa precedentë penalë shfrytëzohen si front për të maskuar origjinën e parave.
Në vitin 2023, Prokuroria e Posaçme nisi procedim penal për pastrim parash ndaj Besjan dhe Leonard Ramaj, si dhe bashkëpunëtorëve të tyre Ardjan Malasi dhe Rajmonda Dashi, ish-drejtoreshë e Kadastrës.
Në kuadër të hetimit u sekuestruan 19 apartamente dhe garazhe në Fier dhe Tiranë me vlerë rreth 1.2 milionë euro.
Në tetor të vitit 2025, Gjykata e Posaçme i shpalli të katërt fajtorë për veprën penale të pastrimit të produkteve të veprës penale, ndërsa rrëzoi akuzën për grup të strukturuar kriminal. Sipas vendimit të gjykatës, në këtë skemë janë përfshirë rreth 1.25 milionë euro dhe 9 milionë lekë.
