Qeveria e Kosovës lehtësoi ditën e sotme masat kufizuese që ishin vendosur për të frenuar përhapjen e koronavirusit. Në zonat e kuqe u hoq ora policore dhe u rikthye lëvizja, ndërsa studentët do i rikthehen mësimit në auditore. Për këtë vendim ka reaguar edhe Federata e Sindikatave të Shëndetësisë në Kosovë e cila e ka cilësuar vendimi skandaloz.
Ndër të tjera, FSSHK ka thënë se asnjë parti politike nuk po reagon për shkak të interesave që kanë dhe se tashmë është në dorën e qytetarëve që të ruajnë veten.
Reagimi i FSSHK:
Skandaloze, e papranueshme lehtësimi i masave nga Qeveria në detyrë, aq më keq si duket për apetite politike asnjë parti politike nuk reagon.
Andaj FSSHK edhe njëherë kërkon përgjegjësi kolektive,popullore që ta ruani veten, është mëse evidente që të gjitha partitë politike nuk e kanë prioritet shëndetin publik të popullit por vetëm votën e tyre.
Apelojmë që IKSHPK dhe të gjithë ekspertët e shëndetësisë të distancohen nga veprimet politike vetëvrasëse dhe të mos jenë pjesë e vendimeve skandaloze për popullin e Republikës së Kosovës.
FSSHK apelon tek të gjitha mediat dhe i lut që të mos jenë pjesë e kësaj kampanje antikombëtare, ne nuk mund të jemi sponzor tuaj, por ne mund të mbrojmë shëndetin tuaj.
Ju lutemi dhe përgjërohemi thirrni mendjes në veprimet tuaja.
Jeta është më e shtrejtë se një votë.
