Lulzim Basha, ka reaguar ashpër ndaj skandalit në Onkologjikun, ku mjekët akuzohen për përfitime në kurriz të pacientëve. Në një postim në Facebook, Basha kritikoi qeverinë e Edi Ramës, duke e akuzuar për kthimin e sektorit shëndetësor në një vatër korrupsioni për të mbushur xhepat e saj.
“Shëndetësinë, sektorin jetik për jetën e shqiptarëve, kjo qeveri e ka kthyer në vatër korrupsioni për të mbushur xhepat e saj,” shkroi Basha. Ai e cilësoi rastin e Onkologjikut, ku bëhet pazar me jetën e pacientëve, si dëshminë më të fundit të degradimit të një sistemi korruptiv. Sipas tij, premtimi për shëndetësi falas është kthyer në një mashtrim, me shqiptarët që paguajnë 60% të shpenzimeve të shëndetësisë nga xhepi.
Basha gjithashtu denoncoi politikën e barnave, duke e quajtur atë një skemë kriminale korruptive që lejon futjen në treg të ilaçeve me cilësi të ulët dhe pa efekt, ndërsa medikamentet për sëmundjet e rënda nuk përfshihen në listën e rimbursimit. “Milionat e eurove që vidhen në tendera e koncesione korruptive do të mjaftonin për t’u ofruar qytetarëve shërbim shëndetësor kudo dhe pensionistëve për t’ua plotësuar nevojat me barna të rimbursueshme,” shtoi ai.
Kreu i PD-së theksoi se problemet e sistemit shëndetësor dhe ndalja e abuzimeve kërkojnë zgjidhje urgjente, të cilat nuk mund të vijnë nga një qeveri që ka 11 vite që mashtron dhe propagandon sukseset imagjinare të një sistemi në kolaps. “Shqipëria meriton më shumë se gjendja në të cilën e ka futur korrupsioni i Edi Ramës, qytetarët shqiptarë meritojnë një qeveri që kujdeset për ta, e që nuk i trajton si kavie për klientelën e saj,” përfundoi Basha.
