Një ngjarje e pazakontë ka ndodhur në spitalin e Infektivit në kryeqytet, ku një infermiere i grabit kartën e kreditit pacientit i cili ndërroi jetë nga Covid19.
Bëhet fjalë për 30 vjeçaren Ronida Hysin. Dyshohet se e reja i ka tërhequr paratë e pacientet me koronavirus në tre këste nga 20 mijë lekë të reja, më datë 25 dhjetor në një bankomat pranë QSUT.
Për ngjarjen e ndodhur katër ditë më parë, Gjykata ka vendosur arrestimin e 30 vjeçares deri në zbardhjen e plotë të çështjes.
Abcnews.al ka siguruar dosjen e prokurorisë ku shpjegohet me detaje se si vijoi hetimi deri në zbulimin e infermieres.
Sipas dosjes hetimore, kamerat e sigurisë të një bankomati në QSUT kanë kapur në orën 08:00 të mëngjesit të datës 25 dhjetor “një vajzë me flokë të kapura, që kishte probleme me të ecurën në këmbën e majtë që kishte kryer veprime me kartën e pacientit Kamber D.”.
Pas kësaj, prokurorët kanë administruar pamjet e kamerave të sigurisë së Infektivit ku në orën 07:53 duket duke dalë nga ambientet e spitalit e njëjta vajzë që është parë 7 minuta më vonë tek bankomati në QSUT.
Pasi kanë bërë krahasimet dhe kanë marrë regjistrimin e personave që ishin në shërbim në turnin e tretë tek Infektivi gjatë natës së datës 24 dhjetor, prokurorët kanë konstatuar se e dyshuara ishte pikërisht Ronida Hysi.
Por avokati i të dyshuarës ka mohuar të gjitha akuzat duke thënë se Ediona e kishte gjetur portofolin dhe se nuk e kishte vjedhur atë.
Prokuroia bën me dije se hetimi për 30 vjeçaren do të vijojë pasi do të shikohet nëse ka pasur dhe rastë të tilla të përsëritura më parë.
