Në gati 8 vite të qeverisë socialiste në dy mandate, nuk kanë qenë të pakët qytetarët që kanë shkuar edhe në burg për mospagesën e disa muajve fature energjie, apo për lidhje të paligjshme.
Madje disa raste kanë përfunduar edhe tragjikisht kur qytetarë që kanë tentuar ta rilidhin energjinë e ndërprerë nga shteti dhe kanë humbur jetën prej korrentit, ose janë vetëvrarë në qelitë e burgut si pasojë e presionit nga këto dënime.
Por paradoksi më i madh është fakti se vetë shteti, nga ana e tij, është abuzuesi më i madh me mospaghesën e faturave të energjisë elektrike.
Por nga ana tjetër, institucionet e buxhetore e kanë impaktuar shumë rëndë bilancin e kompanive publike të energjisë sidomos OSHEE. Sipas të dhënave të Entit Rregullator të Energjisë, në fund muajit gusht borxhi që entet buxhetore dhe ndërmarrjet publike i kishin OSHEE-së, i kaloi të 16 miliardë lekët, ose më shumë se 132 milionë euro.
Borxhi që entet publike i kanë operatorit të Shpërndarjes janë 2,5 herë më të larta se impakti negativ i sektorit të energjisë në buxhet.
Sektori publik i energjisë e ndikoi negativisht buxhetin e shtetit me rreth 6,2 miliardë ose rreth 50 milionë euro vitin e kaluar, sipas një raporti të fundit të Ministrisë së Financave, ku analizohen rreziqet fiskale.
Kosto buxhetore e energjisë është përllogaritur si subvencion direkt për kompanitë e sektorit dhe fitimi i munguar në buxhet nga aktiviteti i sektorit.
Mbështetja buxhetore neto për vitin 2019 në sektorin e energjisë, me ndryshimet në aktin normativ ishte 2 miliardë lekë gjatë vitit 2019. Vitin e kaluar sektori energjetik u përball me një situatë të vështirë kryesisht në drejtim të prodhimit të gjeneruar, i cili pati një rënie të konsiderueshme krahasuar me një vit më parë.
Prodhimi neto vendas i energjisë, për vitin 2019, ishte rreth 39% më i ulët se sa prodhimi i vitit 2018, për faktin se në vitin 2018 kishte një rekord prodhimi referuar nivelit të prodhimit.
Ministria e Financave analizoi se në terma të riskut fiskal, impakti i sektorit si kosto apo të ardhura të munguara në financat publike, për vitin 2019, vlerësohet rreth 6.2 miliardë lekë. Krahasuar me vitin 2018 vihet re një përmirësim i ndjeshëm, pasi sektori pati një kosto rreth 9 miliardë lekë për buxhetin e shtetit.
Ministria e Financave raporton se një arritje e rëndësishme për vitin 2019 është edhe niveli rekord minimal i humbjeve në rrjet me 21.7%, duke shënuar një ulje të humbjeve krahasuar me vlerën 23.96% të vitit 2018.
Gjithashtu, një tregues mjaft i rëndësishëm për sektorin energjetik mbetet niveli i arkëtimeve, i cili është rritur me rreth 2 miliardë lekë krahasuar me vitin 2018, duke shënuar një nivel prej 67.82%.
Ministria e Financave dhe Ekonomisë, periodikisht mbi bazë tremujore mbledh dhe përpunuar dhe analizuar informacionin e nevojshëm në lidhje me treguesit e performancës financiare të tre kompanive të sektorit energjetik.
Kjo, me qëllim identifikimin, vlerësimin, monitorimin dhe raportimin e risqeve fiskale që rezultojnë nga ndërmarrjet publike me kapital shtetëror në tërësi dhe nga sektori energjetik në veçanti, duke konsideruar rëndësinë strategjike të tij dhe problematikat sensitive që e karakterizojnë.
/GazetaReforma.com/
