Zëdhënësja e Partisë Demokratike, Ina Zhupa në një status në Facebook, kërkon që të shkarkohet Denada Seferi, kryetarja e Komitetit të Birësimeve.
Seferi është bashkëshortja e nënkryetarit të Bashkisë së Tiranës.
Zhupa e akuzon atë se duke përdorur lidhjet e Andi Seferit, bashkëshortit të saj, është emëruar në këtë pozicion.
Ndërkohë, sipas saj, Denada Seferi duhet të ishte shkarkuar dhe të dërgohej për ndjekje për “Shpërdorim detyre”.
Statusi i plotë:
“Siç paralajmerova me datë 8 janar, ligji “Për proçedurat e Birësimit dhe Komitetit Shqiptar i Birësimit” kishte ndryshuar për të emëruar Denada Seferin kryetare të komitetit te biresimeve, gruan e nënkryetarit të Bashkisë Tiranë. Me datë 10 janar kanë berë emërimin, duke mos pyetur fare as për denoncimin publik, as për rekordet e zonjës në krye të një institucioni tjetër që u perfshi në skandal. Duket se lidhjet e forta të bashkëshortit që është marrë vetë me birësimet para se të bëhej nënkryetar i Veliajt, kanë ndikuar që zonja të diktojë dhe të paracaktohet në ketë pozicion. Edhe ne vend se të ishte e shkarkuar si Drejtoreshë dhe të dergohej për ndjekje per “shpërdorim detyre”, asaj i kopsitet një pozicion i ri. Ky është shteti i Rames, në shërbim të emrave të vecantë, ndryshojnë ligje, kopsisin pozicione dhe nuk duan tja dine per interesin e qytetareve dhe ne kete rast te jetimeve te Shqiperise,”- shkruan Zhupa.
Po çfarë ka ndodhur dhe për çfarë akuzohet Denada Seferi?
Në tetor të 2019, emisionin ‘Fiks Fare’ ka denoncuar një rast abuzimi seksual ndaj një 12-vjeçareje.
E mitura, e cila jeton në shtëpinë e fëmijëve, “Zyber Hallulli”, tregoi se si është abuzuar seksualisht në shkollë dhe në institucionin e fëmijëve.
Seferi, aso kohe, ka qenë drejtoreshë e Programeve të Zhvillimit për Shëndetësinë dhe Mbrojtjen Sociale në Ministrinë e Shëndetësisë.
Institucioni i drejtuar nga Seferi ka kompetencë politikat për rehabilitimin e fëmijëve.
Po ashtu, ajo ka qenë anëtare bordi në Komunitetin e Birësimeve.
Me publikimin e rastit, PD akuzoi Seferin se është përgjegjëse për këtë gjë, pasi nuk ka marrë masat e duhura.
Së fundmi, Seferi është emëruar kryetare bordi, duke u ngritur në pozicion.
