Skandali me “Patronazhistët” vazhdon të thellohet. Sipas hetimeve të deritanishme të bëra nga SPAK në lidhje me keqpërdorimin e të dhënave të qytetarëve nga Partia Socialiste para zgjedhjeve të 25 prillit, ka dal në konkluzionin se kjo nuk përbën vepër penale. Mësohet se SPAK po heton në lidhje me veprën penale “ Hyrje të paautorizuar kompjuterike”.
Me pak fjalë nuk është marrë parasysh fakti që qindra-mijëra të dhëna personale të qytetarëve të cilat duhet të ruhen nga institucionet shtetërore, u vunë në funksion të Partisë Socialiste në zgjedhjet parlamentare të 25 prillit. SPAK e justifikon këtë me faktin se deri më tani nuk është gjetur asnjë provë, e dhënë ose indicie që të jetë konsumuar vepra penale korrupsion aktiv në zgjedhje.
“Nga tërësia e të dhënave të administruara deri në këtë moment, konstatohet se përgjatë gjithë kohës së kryerjes së këtij hetimi, nuk është mundësuar gjetja e asnjë të dhëne, prove apo indicie, që të jetë konsumuar vepra penale korrupsionit aktiv në zgjedhje. Nuk rezulton që ndonjë veprim korruptiv konkret në fushën zgjedhore, të ketë lindur apo të ketë marrë jetë, si pasojë e të dhënave që janë pasqyruar në bazën e sipërcituar, të publikuar. Ajo që deri më tani mbështet në provat e administruara, ka të bëjë me faktin se ekziston dyshimi, se punonjës të cilët kanë mundësi aksesi në bazën e të dhënave shtetërore, mund të kenë keqpërdorur atributet që u janë ofruar nga kuadri ligjor rregullues, duke vepruar në tejkalim të autorizimit për të hyrë në një sistem kompjuterik a në një pjesë të tij, nëpërmjet cenimit të masave të sigurimit. Për këtë arsye vlerësohet se duhet të procedohet me ndryshimin e kualifikimit ligjor të veprës penale, nga ajo për të cilën ky procedim penal u regjistrua e konkretisht nga neni 328 i K.Penal në atë të parashikuar nga neni 192/b i K.Penal “Hyrja e paautorizuar kompjuterike”.” – publikoi në media MCN.
