Rreth 59% e qytetarëve të New York mendojnë se Guvernatori Andrew Cuomo duhet të japë dorëheqjen pasi hetimi i prokurorisë zbuloi se ai ka ngacmuar seksualisht, ka prekur ose ka puthur pa dëshirën e tyre 11 gra, duke shtuar këtu edhe komentet fyese. Të dhënat vijnë nga një sondazh i “Marist Poll” të mërkurën.
Pasi Prokurorja e Përgjithshme e Shtetit Letitia James zbuloi përfundimet e hetimit të pavarur pesë-mujor të martën, guvernatori demokrat tha në një deklaratë me video se nuk ka në plan të japë dorëheqjen dhe mohoi se kishte vepruar në mënyrë të papërshtatshme.
Reuters shkruan se sondazhi i 614 të rriturve të zgjedhur në mënyrë rastësore nga shteti i Nju Jorkut u krye me numër fiks ose telefon celular të martën dhe pyetjet e sondazhit ishin në dispozicion në anglisht ose spanjisht, tha Marist. U zbulua se 59% thanë se guvernatori duhet të japë dorëheqjen, 32% thanë se ai duhet të mbajë mandatin e tij dhe 9% thanë se nuk ishin të sigurt.
Midis demokratëve të Nju Jorkut, 52% thanë se ai duhet të japë dorëheqjen, 41% thanë se nuk duhet ta bëjë dhe 8% ishin të pasigurt, ndërsa 77% e republikanëve thanë se ai duhet të jepte dorëheqjen, 16% thanë se ai duhet të qëndronte dhe 7% ishin të pasigurt.
Sondazhi gjithashtu zbuloi se 44% e të anketuarve thanë se Cuomo bëri diçka të paligjshme, 29% thanë se ai bëri diçka joetike, por jo të paligjshme, 7% arritën në përfundimin se ai nuk bëri asgjë të keqe, 6% nuk kishin dëgjuar sa duhet për akuzat dhe 13% ishin të pasigurt.
