Teksa pasagjerë të shumtë që kanë paguar biletat e udhëtimit në kompaninë “Fly Ernest” vijojnë të mos kenë asnjë informacion nëse do t’u kthehen apo jo paratë e paguara, detaje të reja dalin në dritë lidhur me kompaninë famëkeqe të transportit ajror.
Së fundmi, në media është bërë publik fakti se “Fly Ernest”, rezulton të ketë të njëjtët pronarë me një tjetër kompani problematike, që ende i detyrohet shtetit shqiptar miliona euro në gjoba: “Belle Air” (lexo këtu).
Ajo që në gjithë këtë histori do t’i bënte përshtypje edhe një fëmije, është fakti që familja Xhelo, ndonëse me një histori të gjatë problematikash në vendin tonë, arriti t’jua hidhte sërish autoriteteve duke u larguar me kompaninë e tyre të pashqetësuar, me paratë që si në rastin e “Belle Air”, shteti shqiptar dhe pasagjerët nuk do t’i shohin kurrë më.
Ilir Xhelo, pronar i ‘Belle Air’ dhe babai i Ilzës (djathtas,lart)
Arbi Xhelo, administrator i ‘Belle Air’ dhe vëllai i Ilzës (djathtas posht)
Qartazi, një dorë e padukshme në këtë mes ka bërë punën e vet…
Së fundmi, “gazetareforma.com” ka mësuar se shkeljet e panumërta në të vërtetë, nuk kanë kaluar pa tërhequr vëmendje.
Burime të sigurta bëjnë me dije se Aeroporti “Nënë Tereza” ka dërguar letra të shumta në adresë të Autoritetit të Aviacionit Civil, por edhe Ministrisë së Energjisë dhe Infrastrukturës që e ka nën varësi këtë institucion.
Sipas burimeve të “gazetareforma.com”, nëse këto vërejtje do ishin marrë parasysh, “Fly Ernest” do ishte larguar kohë më parë nga Rinasi duke mos shkaktuar dëmet financiare që ka shkaktuar sot.
E megjithatë, këto letra mesa duket janë injoruar për të favorizuar dukshëm familjen Xhelo që për të dytën herë, ia doli të shënojë një super gol në portën e shtetit e popullit shqiptar.
