Ish-zëvendësministrja e Financave dhe Ekonomisë, Irena Beqiraj, ka reaguar lidhur me skandalin e bërë publik ditën e djeshme nga Partia Demokratike për e-Albania. Me anë të një statusi në rrjetet sociale Beqiraj thotë me ironi se pret urime nga miqtë e saj, pas durimit që ka treguar kur e telefonojnë nga partitë politike.
“Uromëni! Patjetër që dua të mësoj gjëra të reja, më së shumti në ekonomi ku kuptoj më shumë e di pak. Por kur më marrin në telefon çupëlinat e çunakët e partisë, të më shpjegojnë programet e gënjeshtrave ekonomike, më mbyllet mendja, më rritet presioni i gjakut, më vjen të ulërij… por nuk ulërij. Uromëni! Paskam mësuar të vetëpërmbahem!”, ka shkruar Irena Beqiraj.
Kujtojmë se ditën e djeshme Partia Demokratike, me anë të kandidatit për deputet Ekelejd Alibeja, nga selia e PD-së akuzoi kryeministrin Edi Rama dhe Partinë Socialiste se po përdornin të dhënat e qytetarëve nëpërmjet E-Albania.
DEKLARATA E PD
“Përdorimi i të dhënave personale të portalit E-Albania, nga Rama dhe PS është një shkelje flagrante e privatësisë së qytetarëve. Në mënyrë të paprecedentë, në selinë e PS janë vendosur kompjuterë dhe serverë që përgjojnë dhe përdorin të dhëna personale të qytetarëve, të marra nga portali E-Albania. Është arritur të sigurohet “database”. Në të, ka të dhëna konfidenciale të plot 910 mijë votuesve të Tiranës, nga 19 deri në 99 vjeç. Dokumenti përmban të dhënat personale të secilit prej nesh, si numrat e telefonit, numrin e ID, numri i qendrës së votimit, vendi i punës, dhe përshkrim të përkatësisë politike për secilin prej qytetarëve të Tiranës. Përdoren të dhënat që ne ia kemi besuar shtetit. Përdorimi i databazës nga Rama dhe PS përbën vepër penale. PD po përgatit padi, që do dorëzohet në SPAK. PD do ta ndjekë hap pas hapi në rrugë ligjore këtë çështje, shqiptarët duan të ndihen të sigurt. Rama nuk kursen as të vjedhë e të përdorë të dhënat e qytetarëve. Më 25 prill, shqiptarët do kenë qeveri që kujdeset për ta”, deklaroi dje Enkelejd Alibeaj.
