Skandali i ditës së sotme lidhur me të dhënat personale të siguruara nga qeveria përmes portalit e-Albania. Lapsi.al bëri të ditur sot mënyrën si të dhënat përgjohen dhe si për çdo votues në tiranë ka nga një “patronazhist”. Përjashtim nga kjo skemë nuk përbëjnë as VIP-at. Kështu, përmes të dhënave të publikuara sot, mësuam edhe si i klasifikon Partia Socialiste për sa i përket votës, disa personazhe të njohur.
Një ndër ta është moderatori dhe këngëtari Ardit Gjebrea, që konsiderohet si votues i sigurt. Po ashtu konsiderohet edhe Alketa Vejsiu, që është nën patronazhin e Erald Qosjes. Ndërkohë, Ermal Mamaqi konsiderohet si votues i Partisë Demokratike, ndërsa Arbana Osamni nga ana tjetër, cilësohet si votuese e Lëvizjes Socialiste për Integrim.
Database-i është i përbërë nga të dhënat e më shumë se 910 mijë votuesve ne Tirane, mes tyre edhe emra të njohur të ekranit si Blendi Fevziu, Eni Vasili, Mero Baze, Andi Bushati, Fatos Lubonja, Armand Shkullaku, Arjan Canni e Ylli Rakipi. Ata janë skeduar sipas preferencave politike dhe votës së mundshme në zgjedhjet e 25 prillit. E njëjta gjë është bërë për çdo votues në Tiranë, ndërsa Lapsi.al shkruan se një database e tillë është në çdo degë të PS në Shqipëri.
