ONE Albania sërish nën akuza/ Qendra e Shërbimeve Ligjore Evropiane denoncon: Klientëve që paguajnë rregullisht u kërkohen borxhe, kërcënohen me përmbarim

ONE Albania përballet me një tjetër denoncim për mënyrën e trajtimit të klientëve të saj. Qendra e Shërbimeve Ligjore Evropiane (CELS) ka ngritur alarmin se bizneseve dhe abonentëve që paguajnë rregullisht faturat u kërkohet shlyerja e detyrimeve të pretenduara, përmes kompanive të mbledhjes së borxheve, duke i paralajmëruar edhe për ndjekje gjyqësore dhe përmbarimore brenda 10 ditësh.

Sipas CELS, disa subjekte tregtare, megjithëse janë klientë aktivë të ONE Albania dhe paguajnë fatura mujore mbi 15 mijë lekë, kanë marrë njoftime për detyrime të prapambetura prej rreth 1 mijë lekësh për çdo numër kontrate.

Në denoncim përmendet edhe shoqëria ODMC Albania, si një prej kompanive të përfshira në dërgimin e këtyre njoftimeve. Klientëve u është komunikuar një afat prej 10 ditësh për shlyerjen e detyrimeve, i shoqëruar me paralajmërime për procedura gjyqësore dhe përmbarimore.

CELS paralajmëron se një detyrim fillestar prej vetëm 1 mijë lekësh mund të sjellë shpenzime shumë më të larta për qytetarët dhe bizneset, përfshirë tarifat gjyqësore, shpenzimet e avokatisë dhe tarifat përmbarimore.

Qendra u bën thirrje klientëve të mos kryejnë pagesa të nxituara pa verifikuar më parë origjinën e detyrimit, dokumentacionin përkatës dhe bazën ligjore të kërkesës. Sipas CELS, disa prej këtyre detyrimeve mund të jenë të parashkruara ose të kundërshtueshme ligjërisht, çka kërkon shqyrtimin e secilit rast.

Për subjektet tregtare që janë klientë të ONE Albania, paguajnë mbi 15 mijë lekë në muaj dhe kanë marrë njoftime të tilla, CELS njofton se ofron asistencë ligjore falas.

Ky nuk është rasti i parë që ONE Albania përballet me ankesa dhe denoncime për shërbimet e saj. Gazeta Reforma ka raportuar më herët për probleme me sistemin e pagesave, ndërprerje të telefonisë dhe internetit, ankesa për tarifat dhe faturimin, si dhe raste kur klientët pretendonin se paguanin për shërbime që nuk i merrnin sipas kushteve të kontratës. Reforma ka trajtuar gjithashtu denoncimet e rreth 100 punonjësve për pagat dhe kushtet e punës, pikëpyetjet mbi humbjet financiare të kompanisë dhe transaksionet e aksioneve, si dhe incidentin e dhunshëm në ambientet e ONE Albania në Laprakë, ku persona të maskuar dëmtuan pajisje. Në vitin 2023, AKEP vendosi edhe një gjobë prej 10 milionë lekësh ndaj operatorit për shkelje ligjore. Këto raste, të raportuara në periudha të ndryshme, kanë ngritur shqetësime për cilësinë e shërbimit, transparencën dhe marrëdhëniet e kompanisë me klientët dhe punonjësit.

Denoncimi i fundit i CELS rikthen në vëmendje një tjetër problem: mënyrën se si krijohen, evidentohen dhe kërkohen detyrimet financiare të abonentëve, veçanërisht kur bëhet fjalë për klientë që vazhdojnë të paguajnë rregullisht.

Mbetet për t’u sqaruar se mbi çfarë dokumentacioni mbështeten kërkesat për borxhe, nëse klientët janë njoftuar më parë për detyrimet dhe në çfarë kushtesh këto kërkesa u janë kaluar kompanive të mbledhjes së borxheve.

AKEP dhe institucionet përgjegjëse për mbrojtjen e konsumatorëve duhet të verifikojnë ligjshmërinë e këtyre procedurave, ndërsa ONE Albania dhe ODMC Albania duhet të sqarojnë bazën e detyrimeve të pretenduara.