Autoriteti Rrugor Shqiptar është përfshirë në një tjetër skandal për ndërtimin e Unazës së Re, teksa ka akorduar një shumë prej 4.5 milionë euro shtesë për vijimin e punimeve.
Ndërkohë që analisti Lutfi Dervishi ka reaguar në lidhje me skandalin e ARRSH-së, institucion në varësi të ministrisë së Infrastrukturës, së ministres Belinda Balluku. Me anë të një reagimi në profilin e tij në ‘Facebook’ Dervishi thekson se e gjithë unaza është vetëm 28 km dhe ka 28 vite që është copëtuar në 7 lote, ndërsa shtoi se për këtë vepër ndërrohet projektet dhe ribëhen punimet. Mes ironisë Dervishi thekson se të vetmet që nuk ndryshojnë janë inspektimet dhe trafiku.
“E gjithë unaza është 28 km! Ka 28 vjet, është copetuar në 7 lote në të cilat punohet ditë e natë, ka prodhuar qindra inspektime/lajme dhe sigurisht dhjetëra milionë euro!
Ndërrohet projekti, ribëhen punët dhe sigurisht shtohen fondet! Të vetmit që nuk ndryshojnë janë inspektimet dhe trafiku!”, shkruan me ironi analisti Lutfi Dervishi.
Vlen të theksohet se Autoriteti Rrugor Shqiptar nga njëra anë tenderon dhjetëra miliona euro me tendera normalë, dhe nga ana tjetër akordon fonde shtesë, duke ngritur dyshime të mëdha se po favorizohen të njëjta firma që u përfshinë në skandal edhe para disa viteve. /Gazeta Reforma
